Mediat italiane raportojnë se disa nga figurat më të fuqishme të trafikut të drogës me origjinë shqiptare po qëndrojnë në Dubai, duke i shpëtuar drejtësisë ndërsa vazhdojnë të drejtojnë aktivitetet kriminale nga distanca.
Sipas gazetës italiane Il Messaggero, tre persona të njohur në botën e krimit – Dorian Petoku i njohur si “Dori”, Altin Sinomati i njohur si “Aldo” dhe një tjetër i identifikuar si “Beni” – konsiderohen nga hetuesit ndër organizatorët kryesorë të trafikut të drogës që operon mes Evropës dhe Amerikës së Jugut.
Autoritetet italiane kanë shprehur shqetësim se për Petokun dhe Sinomatin ende nuk është dhënë drita jeshile për ekstradimin nga Dubai, çka sipas hetuesve mund t’u lejojë atyre të vazhdojnë menaxhimin e rrjeteve të narkotrafikut nga larg.
Petoku u arrestua në Dubai në korrik të vitit 2024, pasi ishte arratisur nga Italia në vitin 2023 gjatë kohës që ndodhej në një komunitet rehabilitimi në Nola. Ai kishte vuajtur më parë një pjesë të dënimit pas operacionit të njohur kundër krimit të organizuar “Grande Raccordo Criminale”.
Ndërkohë, Sinomati akuzohet nga prokurorët italianë si porositësi i vrasjes së Selavdi Shehajt, i njohur si “Passerotto”, një krim i ndodhur në vitin 2020 në plazhin e Torvaianicës. Sipas hetimeve, për eliminimin e tij janë paguar rreth 150 mijë euro.
Deputetja italiane Stefania Ascari ka kërkuar nga qeveria që të ndërmerren hapa të mëtejshëm për të përshpejtuar procedurat e ekstradimit, duke paralajmëruar se zvarritja e tyre mund të dëmtojë luftën kundër krimit të organizuar ndërkombëtar.
Sipas hetuesve, këta persona dyshohet se vazhdojnë të kontrollojnë rrugët e trafikut të kokainës në Evropë përmes rrjeteve të organizuara në Itali, Gjermani dhe Holandë, duke përdorur komunikime të koduara dhe struktura kriminale të mirëorganizuara.
