Prindërit që kanë rritur fëmijë në Gjermani mund të përfitojnë një rritje të konsiderueshme të pensionit. Sipas sistemit të sigurimit pensional në vend, periudhat e rritjes së fëmijëve mund të sjellin deri në 122 euro më shumë pension në muaj për çdo fëmijë.
Sipas rregullave të Deutsche Rentenversicherung, prindërve u njihen periudha të veçanta sigurimi për kohën që kujdesen për fëmijët, të cilat llogariten si kontribute pensioni edhe nëse ata nuk punojnë gjatë kësaj kohe.
Sa kohë njihet për rritjen e fëmijëve
Kohëzgjatja e periudhës së njohur varet nga viti i lindjes së fëmijës:
-
Fëmijët e lindur para vitit 1992: deri në 30 muaj
-
Fëmijët e lindur nga viti 1992 e tutje: deri në 36 muaj
Kjo periudhë fillon të llogaritet nga muaji pas lindjes së fëmijës dhe konsiderohet si periudhë e plotë sigurimi për pension.
Sa rritet pensioni
Gjatë kësaj periudhe, shteti paguan kontributet sikur prindi të kishte të ardhura mesatare. Për çdo vit të kujdesit për fëmijën jepet afërsisht një pikë pensioni.
Aktualisht:
-
1 pikë pensioni = rreth 40.79 € në muaj
Kjo do të thotë:
-
Për fëmijët e lindur pas vitit 1992:
3 vite × 40.79 € ≈ 122.37 € pension shtesë në muaj -
Për fëmijët e lindur para vitit 1992:
2.5 vite × 40.79 € ≈ 101.98 € pension në muaj
Kush e merr këtë përfitim
Në shumicën e rasteve, periudha e rritjes së fëmijëve i kreditohet automatikisht nënës. Megjithatë, ajo mund të transferohet te babai nëse të dy prindërit paraqesin një kërkesë të përbashkët.
Përfitimi mund të vlejë edhe për:
-
prindërit adoptues,
-
njerkët,
-
kujdestarët ligjorë,
-
në disa raste edhe gjyshërit ose të afërmit që kanë kujdesur për fëmijën.
Autoritetet gjermane kanë paralajmëruar gjithashtu një reformë të re, të njohur si “Pensioni i Nënave III”, e cila synon të barazojë periudhat e njohura për të gjithë fëmijët deri në 36 muaj, pavarësisht vitit të lindjes.
