Presidenti i SHBA-së, Donald Trump, deklaroi se forcat amerikane dhe ato të Israel kanë shkatërruar rreth 80 për qind të bazave të lëshimit të raketave të Iran, gjatë operacioneve të fundit ushtarake.
Komentet e tij vijnë vetëm disa orë pasi ai tha se konflikti është “shumë i plotë dhe pothuajse i mbyllur”.
Duke folur për veprimet ushtarake kundër Iranit, Trump i përshkroi ato si një “ekskursion të vogël” për të eliminuar një rrezik, duke shtuar se operacioni pritet të jetë afatshkurtër.
“Ne bëmë një ekskursion të vogël sepse menduam se duhej ta bënim atë për të hequr qafe një të keqe. Mendoj se do të shihni se do të jetë një operacion i shkurtër. Kemi fituar në shumë mënyra, por nuk kemi fituar mjaftueshëm. Po ecim përpara më të vendosur se kurrë për të arritur fitoren përfundimtare”, deklaroi Trump.
Referimi te Soleimani
Trump përmendi edhe vrasjen e komandantit iranian Qasem Soleimani gjatë mandatit të tij të parë si president.
“Ai ishte i aftë, i dhunshëm dhe i rrezikshëm. Por ne e eliminuam të parët”, tha Trump.
Paralajmërimi për një sulm të mundshëm
Sipas presidentit amerikan, Irani ishte duke u përgatitur për një sulm të madh ndaj SHBA-së dhe aleatëve të saj në rajon.
“Brenda një jave ata do të na sulmonin 100%. Kishin shumë më tepër raketa sesa mendonte kushdo dhe do të sulmonin të gjithë Lindjen e Mesme dhe Izraelin”, u shpreh ai.
Trump shtoi se shumica e bazave të raketave iraniane tashmë janë neutralizuar.
“Rreth 80% e vendeve të lëshimit të raketave janë shkatërruar. U kanë mbetur shumë pak”, deklaroi ai.
Lavdëron ushtrinë amerikane
Trump lavdëroi gjithashtu ushtrinë amerikane për operacionet e kryera.
“Raketat janë shkatërruar, dronët janë rrëzuar dhe po godasim vendet ku prodhohen ato. Është një operacion i madh, por bota do të jetë më e sigurt sapo gjithçka të përfundojë – dhe do të përfundojë shpejt”, përfundoi ai.
