Deputeti i Lidhja Demokratike e Kosovës dhe ish-kryeministri i Kosovës, Avdullah Hoti, ka ngritur dyshime mbi mënyrën se si janë shpenzuar fondet për investime kapitale gjatë viteve 2021–2025.
Sipas Hotit, analiza e buxhetit të shtetit tregon se në këtë periudhë janë shpenzuar afër 3 miliardë euro për shpenzime kapitale, por sipas tij është e vështirë të identifikohen projektet konkrete ku janë investuar këto mjete.
Ai thekson se pas përjashtimit të investimeve të komunave, të cilat sipas tij janë relativisht të vogla, mbetet e paqartë se cilat projekte kanë absorbuar pjesën më të madhe të këtyre fondeve.
Projekte të mëdha ende të papërfunduara
Hoti përmendi se disa nga projektet infrastrukturore kryesore në vend ende nuk janë përfunduar, përfshirë rrugët kryesore rajonale dhe autostradën e Anamoravës, duke lënë të kuptohet se këto projekte nuk janë paguar plotësisht.
Ai shtoi se edhe dy projekte të mëdha infrastrukturore, që pritej të merrnin një pjesë të konsiderueshme të investimeve kapitale, nuk kanë nisur ende.
Bëhet fjalë për projektin e hekurudhës drejt Durrësit dhe projektin e tunelit Prizren–Tetovë, të cilat sipas tij ishin planifikuar si investime madhore.
Thirrje për sqarim të shpenzimeve
Duke ngritur pikëpyetje mbi përdorimin e fondeve publike, Hoti kërkoi sqarime për mënyrën se si janë shpenzuar këto mjete nga buxheti i shtetit.
“Atëherë ku janë shpenzuar gjithë këto mjete?”, pyeti ai në reagimin e tij publik.
