Ministri i Mbrojtjes i Kosovës, Ejup Maqedonci, ka zhvilluar një takim me ministrin e Mbrojtjes së Belgjikës, Theo Francken, në margjinat e panairit ndërkombëtar të mbrojtjes BEDEX 2026.
Gjatë takimit, dy ministrat diskutuan për thellimin e bashkëpunimit ndërmjet Kosovës dhe Belgjikës në fushën e mbrojtjes dhe sigurisë, me fokus në zhvillimin e industrisë së mbrojtjes dhe forcimin e bashkëpunimit ndërmjet ushtrive të dy vendeve.
Sipas Maqedoncit, në bisedime u trajtuan edhe mundësitë për trajnime të përbashkëta ushtarake dhe shkëmbimin e oficerëve për shkollim dhe avancim profesional.
Akreditimi i atasheut të mbrojtjes në Belgjikë
Ministri i Mbrojtjes bëri të ditur se një hap i rëndësishëm në këtë drejtim është edhe akreditimi i Atasheut të Mbrojtjes të Republikës së Kosovës në Belgjikë, proces që pritet të zyrtarizohet së shpejti.
Sipas tij, kjo pritet të kontribuojë drejtpërdrejt në forcimin e bashkëpunimit institucional dhe ushtarak ndërmjet dy vendeve.
Maqedonci theksoi se Kosova po vazhdon të ndërtojë partneritete të forta me aleatët ndërkombëtarë, duke synuar rritjen e kapaciteteve të mbrojtjes dhe avancimin drejt integrimit euroatlantik.
