Presidenti i SHBA-së, Donald Trump, ka bërë thirrje për krijimin e një koalicioni ndërkombëtar për të marrë nën kontroll Ngushtica e Hormuzit, një nga korridoret më strategjike të transportit të naftës në botë.
Sipas deklaratave të fundit, Trump synon që SHBA dhe aleatët e saj të garantojnë kalimin e sigurt të anijeve në këtë rrugë detare, në mes të përshkallëzimit të konfliktit me Iranin.
“SHBA ka goditur rëndë Iranin ushtarakisht dhe ekonomikisht, por vendet që marrin naftë përmes Hormuzit duhet të kujdesen për këtë kalim. Ne do të jemi pranë tyre”, deklaroi Trump.
Plani për “invazion të vogël”
Sipas raportimeve, strategjia amerikane përfshin edhe një operacion tokësor të kufizuar – të përshkruar si një “invazion i vogël” – për të siguruar kontrollin e zonës strategjike.
Në kuadër të këtij plani, rreth 5,000 marinsa amerikanë pritet të vendosen në rajon për të mbështetur operacionet ushtarake dhe për të mbrojtur korridoret detare të naftës.
Administrata amerikane po kërkon gjithashtu mbështetjen e vendeve aleate që kanë interesa ekonomike dhe energjetike në rajon, me qëllim krijimin e një force të përbashkët për sigurinë e transportit detar.
Lëvizje të reja ushtarake në rajon
Në të njëjtën kohë, marina amerikane ka urdhëruar dërgimin e anijes luftarake USS Tripoli drejt Gjirit Persik për të marrë pjesë në operacionet e mundshme në rajon.
Sipas raportimeve të BBC, SHBA ka transferuar gjithashtu sisteme mbrojtëse kundër raketave nga Koreja e Jugut për të forcuar mbrojtjen e forcave të saj dhe të aleatëve në Lindjen e Mesme.
Rriten tensionet në Lindjen e Mesme
Trump ka paralajmëruar se goditje të reja ushtarake kundër Iranit mund të ndodhin brenda ditëve të ardhshme, ndërsa ka refuzuar për momentin çdo negociatë diplomatike me Teheranin.
Nga ana tjetër, autoritetet iraniane kanë deklaruar se nuk do të pranojnë bisedime për paqe derisa SHBA dhe Izraeli të ndalin sulmet ajrore.
Ekspertët paralajmërojnë se tensionet në rajon po rriten ndjeshëm dhe se konflikti mund të hyjë në një fazë më të rrezikshme nëse situata vazhdon të përshkallëzohet.
