Presidenti i Shteteve të Bashkuara të Amerikës, Donald Trump, ka rritur tonet ndaj aleatëve perëndimorë duke lënë të hapur mundësinë e tërheqjes së SHBA-së nga NATO, nëse, sipas tij, nuk ka mbështetje të mjaftueshme në përballjen me Iranin.
Gjatë një deklarate nga Zyra Ovale, Trump u shpreh se SHBA nuk ka nevojë për ndihmë nga aleatët dhe kritikoi ashpër Aleancën, duke e cilësuar si të pasigurt në momente kyçe. “Ne nuk kemi nevojë për asnjë ndihmë… nëse nuk na ndihmojnë, do ta shqyrtojmë largimin”, tha ai, duke shtuar se një vendim i tillë mund të merret prej tij pa miratimin e Kongresit.
Presidenti amerikan u shpreh i zhgënjyer me kontributin e aleatëve ndër vite, duke theksuar se SHBA ka shpenzuar triliona dollarë për sigurinë globale, ndërsa përfitimet, sipas tij, kanë qenë të pakta. Ai përmendi edhe luftën në Ukrainë, duke pretenduar se pa ndihmën amerikane vendi do të kishte rënë brenda një dite.
Trump hodhi poshtë edhe paralajmërimet nga Irani për një “Vietnam të ri”, duke deklaruar se nuk ka frikë nga një skenar i tillë dhe se SHBA mbetet e vendosur në veprimet e saj ushtarake.
Në të njëjtën kohë, ai komentoi marrëdhëniet me Mbretërinë e Bashkuar dhe kryeministrin Keir Starmer, duke shprehur kritika për mungesë reagimi të shpejtë ndaj kërkesave amerikane për mbështetje ushtarake. Trump tha se kishte kërkuar ndihmë të kufizuar, si anije çminuese, por sipas tij përgjigjja britanike ishte e vonuar.
Edhe pse u përpoq të mbante një ton më të butë në aspektin personal, duke thënë se e pëlqen Starmer, ai e krahasoi atë me Winston Churchill, duke shtuar se “fatkeqësisht, Keir nuk është Churchill”.
Deklaratat e Trump vijnë në një moment tensionesh të larta globale dhe rrisin pikëpyetjet mbi të ardhmen e marrëdhënieve transatlantike dhe rolin e NATO-s në një konflikt të mundshëm më të gjerë.
