Bashkëpunimi ushtarak mes Rusisë dhe Iranit duket se ka hyrë në një fazë të re dhe më të rrezikshme, pasi sipas raportimit të Wall Street Journal, Moska po i ofron Teheranit jo vetëm teknologji, por edhe informacione sensitive mbi pozicionet e forcave amerikane në Lindjen e Mesme.
Burimet e cituara nga WSJ bëjnë të ditur se Rusia ka ndarë imazhe satelitore dhe të dhëna të inteligjencës që ndihmojnë Iranin të identifikojë objektiva strategjikë të Shteteve të Bashkuara të Amerikës dhe aleatëve të saj në rajon. Kjo mbështetje ka nisur që në ditët e para të konfliktit dhe është intensifikuar me kalimin e javëve.
Në të njëjtën kohë, Moska po i ofron Teheranit ekspertizë konkrete për përdorimin e dronëve luftarakë, veçanërisht për modelet e tipit “Shahed”. Këto përfshijnë përmirësime në navigim, komunikim dhe saktësi goditjeje, si dhe këshilla taktike mbi mënyrën e sulmit – nga lartësia e operimit deri te numri optimal i dronëve për të depërtuar mbrojtjen ajrore.
Analistët vlerësojnë se përvoja ruse nga lufta në Ukrainë po transferohet drejtpërdrejt në Lindjen e Mesme, duke e bërë Iranin më efektiv në sulmet ndaj radarëve dhe objektivave ushtarake në Gjirin Persik.
Megjithatë, zyrtarët rusë kanë mohuar përfshirjen direkte në operacione sulmuese, ndërsa presidenti amerikan Donald Trump ka deklaruar se beson që Moska “mund të jetë duke ndihmuar pak” Iranin, duke shtuar dyshimet për një përfshirje më të thellë.
Ekspertët paralajmërojnë se kjo aleancë e heshtur mund të ndryshojë balancat në rajon dhe të rrisë rrezikun e një përplasjeje më të gjerë ndërkombëtare, në një moment kur tensionet globale janë tashmë në kulm.
Për Rusinë, kjo situatë shihet edhe si një mundësi strategjike për të sfiduar SHBA-në në një front tjetër, ndërsa përfiton nga rritja e çmimeve të energjisë dhe konsumimi i burimeve ushtarake amerikane.
