Në orët e para të mëngjesit, qindra besimtarë myslimanë janë mbledhur në Xhamia e Madhe në Prishtinë për të falur namazin e Fitër Bajrami, duke shënuar përfundimin e muajit të shenjtë të Ramazanit.
Oborri dhe hapësirat përreth xhamisë u mbushën me besimtarë të moshave të ndryshme, të cilët morën pjesë me përkushtim në këtë ritual të rëndësishëm fetar.
Gjatë hytbes së Bajramit, Myftiu i Kosovës, Naim Tërnava, theksoi rëndësinë e ruajtjes së vlerave të fituara gjatë Ramazanit, duke veçuar solidaritetin, ndihmën ndaj nevojtarëve dhe forcimin e lidhjeve familjare e shoqërore.
Ai u bëri thirrje besimtarëve që këto vlera të mos mbeten vetëm pjesë e një muaji, por të vazhdojnë të reflektohen në jetën e përditshme.
Në mesazhin e tij, Tërnava apeloi gjithashtu për më shumë unitet në shoqëri, duke iu drejtuar edhe liderëve politikë që interesat e shtetit dhe të qytetarëve të vendosen gjithmonë në plan të parë.
Ndërkohë, Bashkësia Islame e Kosovës ka bërë të ditur se besimtarët myslimanë në Kosovë dhe në mbarë botën po kremtojnë sot Fitër Bajramin, një festë që simbolizon sakrificën, faljen dhe solidaritetin.
