Kryeministri i Kosovës, Albin Kurti, ka uruar besimtarët myslimanë me rastin e Fitër Bajrami, duke përcjellë një mesazh për solidaritet, mirënjohje dhe përkushtim ndaj familjes dhe shoqërisë.
Në urimin e tij, Kurti ka shprehur dëshirën që agjërimi dhe lutjet e besimtarëve të jenë pranuar, ndërsa ka theksuar rëndësinë e reflektimit dhe falënderimit për të mirat që gëzojmë.
“Le të na gjejë kjo ditë feste më falënderues për të mirat që kemi, më solidarë me nevojat e atyre që kanë më pak dhe më të vëmendshëm ndaj përmirësimit si individë dhe si shoqëri”, ka shkruar ai.
Kryeministri ka vënë theks të veçantë edhe te kujdesi ndaj fëmijëve, duke i cilësuar ata si “amanet i shenjtë”, ndërsa ka theksuar se përgjegjësia ndaj tyre duhet të jetë e vazhdueshme.
“Le të mos presim sprovën për të treguar mirësi, respekt dhe përkushtim ndaj fëmijëve”, është shprehur Kurti.
Mesazhi i tij vjen në një ditë feste për besimtarët myslimanë, e cila simbolizon përfundimin e muajit të Ramazanit dhe përcjell vlera të solidaritetit, mëshirës dhe bashkimit.
