Kryeministri i Kosovës, Albin Kurti, ka zhvilluar një vizitë zyrtare në Paris, ku është pritur në Pallati Elize nga presidenti i Francës, Emmanuel Macron.
Gjatë një takimi dhe dreke pune që zgjati rreth dy orë, palët diskutuan për zhvillimet kryesore në fushën e sigurisë dhe bashkëpunimit ndërkombëtar, me fokus të veçantë në rolin e NATO në Kosovë dhe angazhimin e misioneve të Bashkimit Evropian.
Kryeministri Kurti theksoi përkushtimin e Kosovës për harmonizim të plotë me politikën e jashtme dhe të sigurisë së BE-së, ndërsa kërkoi mbështetjen e Francës në procesin e integrimit evropian dhe anëtarësimin në organizata ndërkombëtare.
Në takim u diskutua gjithashtu për thellimin e bashkëpunimit ekonomik mes dy vendeve, përmes organizimit të forumeve të reja të biznesit Kosovë–Francë, me synim rritjen e investimeve dhe shkëmbimeve tregtare.
Çështjet e sigurisë zënë një vend të rëndësishëm në bisedime, përfshirë forcimin e kapaciteteve mbrojtëse të Kosovës dhe zhvillimet në dialogun me Serbinë, si dhe zbatimin e marrëveshjeve për normalizim.
Kryeministri shprehu mirënjohje për mbështetjen e vazhdueshme të Francës, duke e cilësuar atë si partner kyç në rrugëtimin e Kosovës drejt integrimit dhe konsolidimit ndërkombëtar.
