Shoqata e të burgosurve politikë në Kosovë ka reaguar ashpër ndaj një përmbajtjeje publike që, sipas tyre, shtrembëron të vërtetën historike lidhur me Masakrën e Dubravës, duke e cilësuar këtë si një veprim të papranueshëm dhe të rrezikshëm.
Në reagimin publik, shoqata shpreh indinjatë të thellë për atë që e quan përdhosje të së kaluarës dhe inkriminim të viktimave, duke theksuar se një përmbajtje e tillë nuk duhet të kishte marrë asnjëherë miratim institucional.
Ata kanë kërkuar përgjegjësi të drejtpërdrejtë nga Kuvendi i Kosovës për lejimin e kësaj përmbajtjeje, duke e cilësuar atë si një akt skandaloz me pasoja të rënda për kujtesën historike.
Po ashtu, shoqata u ka bërë thirrje institucioneve të drejtësisë, përfshirë Prokuroria e Shtetit dhe Agjencia Kosovare e Inteligjencës, që të nisin hetime për identifikimin dhe ndjekjen penale të autorëve.
Sipas reagimit, veprime të tilla që shtrembërojnë historinë dhe relativizojnë krimet e luftës konsiderohen të dëmshme dhe në kundërshtim me interesin publik, duke paralajmëruar se ato mund të përdoren edhe për propagandë kundër Kosovës.
Shoqata thekson se në një kohë kur dezinformimi dhe “lajmet e rreme” janë kthyer në mjete të luftërave hibride, institucioneve u kërkohet reagim i menjëhershëm dhe serioz.
Në fund, kërkohet anulimi i menjëhershëm i ekspozitës dhe largimi i saj nga hapësirat publike, duke shprehur shqetësim edhe për mungesën e reagimit institucional deri tani.
