Kryetari i Prishtinës, Përparim Rama, ka vendosur pezullimin e menjëhershëm të një ekspozite në sheshin e kryeqytetit, duke e cilësuar atë si të papranueshme dhe fyese për kujtesën kolektive të qytetarëve.
Sipas tij, ekspozita e financuar nga Kuvendi i Kosovës paraqet një version të pasaktë të Masakrës së Dubravës, duke përdhosur dinjitetin e viktimave dhe duke shkaktuar reagime të forta në opinionin publik.
“Jo në Prishtinë. Nuk lejojmë që në sheshin e kryeqytetit të fyhet kujtesa kolektive e popullit tonë,” ka deklaruar Rama, duke bërë të ditur se leja për ekspozimin është revokuar menjëherë.
Ai ka kërkuar gjithashtu përgjegjësi politike dhe institucionale për miratimin dhe financimin e kësaj përmbajtjeje, duke e cilësuar rastin si skandaloz.
Ky zhvillim vjen pas reagimeve të shumta publike dhe thirrjeve për ndërhyrje institucionale, duke e kthyer çështjen në një debat të gjerë mbi trajtimin e historisë dhe respektimin e viktimave të luftës në Kosovë.
