Qeveria e Republikës së Kosovës ka mbajtur mbledhjen e saj të rregullt, duke miratuar një sërë vendimesh me ndikim ekonomik, social dhe institucional në vend.
Ndër vendimet kryesore, ekzekutivi ka aprovuar ndarjen e 500 mijë eurove shpërblim për futbollistët e përfaqësueses së Kosovës, si dhe pagën e 13-të për punonjësit që paguhen nga buxheti i shtetit, për ata që plotësojnë kriteret.
Në planin ligjor, janë miratuar disa projektligje të rëndësishme, përfshirë atë për konfiskimin e pasurisë së pajustifikueshme, krijimin e një Inspektorati Qendror për mjedisin dhe sigurinë, si dhe ligje për menaxhimin e resurseve ujore dhe banimin social, që synojnë të mbështesin shtresat në nevojë.
Një tjetër vendim i rëndësishëm është kërkesa që Forca e Sigurisë së Kosovës të dërgohet jashtë vendit, si pjesë e një misioni ndërkombëtar stabilizues në Gaza.
Qeveria gjithashtu ka miratuar shpronësime për projektin e zgjerimit të rrugës N25 (QMI–Lipjan), rialokim fondesh për zhvillim rajonal, si dhe themelimin e një komisioni ministror për ndërmarrjet publike.
