Kryetari i AAK-së, Ramush Haradinaj, ka marrë pjesë në përkujtimin e 106 martirëve të ekzekutuar në fshatin Pastasel të Rahovecit, gjatë luftës në Kosovë.
Në këtë aktivitet përkujtimor, së bashku me kryetarin e komunës Smajl Latifi, familjarë dhe bashkëpunëtorë, u nderua kujtimi i viktimave që ishin strehuar në këtë fshat për t’i shpëtuar dhunës, por që u ekzekutuan nga forcat serbe.
Haradinaj theksoi se në mesin e viktimave kishte të moshuar, gra dhe fëmijë, ndërsa përmendi edhe 42 civilë të vrarë nga fshati Burim i Malishevës, të cilët patën të njëjtin fat tragjik.
“Jetojmë çdo ditë me lavdinë e të rënëve dhe me sakrificën që forcoi rrugën tonë drejt lirisë. Kujtimi për ta mbetet i përhershëm, ndërsa detyrimi ynë është ta mbrojmë dhe ta forcojmë Kosovën”, ka deklaruar ai.
Ngjarja rikthen në vëmendje krimet e kryera gjatë luftës në Kosovë dhe rëndësinë e ruajtjes së kujtesës historike për viktimat civile.
