Bashkimi Evropian pritet të nisë nga 10 prilli zbatimin e sistemit të ri të kontrollit kufitar EES, një mekanizëm biometrik që do të ndikojë drejtpërdrejt edhe tek bashkëatdhetarët shqiptarë që udhëtojnë për punë në vendet e BE-së.
Sistemi i ri parashikon regjistrimin e gjurmëve të gishtërinjve dhe fotografimin e fytyrës për çdo hyrje në zonën Shengen, ndërsa për hyrjet e mëvonshme do të mjaftojë vetëm identifikimi përmes fotografisë.
Sipas të dhënave nga institucionet evropiane, deri tani në këtë sistem janë regjistruar rreth 45 milionë pasagjerë në nivel global, duke e bërë atë një nga projektet më të mëdha të kontrollit kufitar në Evropë.
Zbatimi i EES pritet të sjellë edhe ndryshime praktike në kufi. Mediat raportojnë se kontrolli mund të zgjasë më shumë, pasi udhëtarët do të duhet të dalin nga automjetet gjatë verifikimit, duke shtuar kohën e pritjes nga 2 deri në 5 minuta për person.
Megjithatë, autoritetet kufitare do të kenë mundësi të pezullojnë përkohësisht kontrollet biometrike në rast të fluksit të madh, sidomos gjatë sezonit turistik. Nëse pritjet kalojnë mbi tre orë, kontrolli mund të rikthehet përkohësisht në formatin tradicional me pasaporta.
Ky fleksibilitet do të jetë i vlefshëm për një periudhë fillestare prej 90 ditësh nga nisja e sistemit, me mundësi shtesë zgjatjeje edhe për 60 ditë të tjera.
Sistemi EES synon të forcojë sigurinë në kufijtë e BE-së, duke identifikuar më lehtë rastet e dokumenteve të falsifikuara dhe personat që përbëjnë rrezik. Sipas autoriteteve, mijëra persona janë refuzuar tashmë në kufi falë këtij sistemi, ndërsa janë zbuluar edhe raste të përdorimit të identiteteve të dyfishta.
Ndikimi i këtyre rregullave pritet të ndihet veçanërisht tek bashkëatdhetarët shqiptarë që udhëtojnë shpesh drejt vendeve të BE-së për punë sezonale apo afatgjatë, si dhe tek shoferët e transportit ndërkombëtar, të cilët do të përballen me kontrolle më të rrepta për respektimin e rregullit të qëndrimit 90 ditë brenda gjashtë muajve.
Në një Evropë që po forcon filtrat e saj, kalimi i kufirit nuk do të jetë më thjesht një vulë në pasaportë, por një skanim i plotë i identitetit.
