Sulmuesi i Kosovës, Vedat Muriqi, ka qenë hero i mbrëmjes në La Liga, duke i dhënë fitoren dramatike RCD Mallorca ndaj Real Madrid me rezultat 2-1.
Ndeshja nisi me surprizë për madrilenët, pasi vendasit kaluan në avantazh në pjesën e parë me golin e Manu Morlanes, duke vënë në vështirësi “Galaktikët” që kërkonin me çdo kusht tri pikët në garën për titull.
Në pjesën e dytë, Real Madridi reagoi dhe arriti të barazojë në minutat e fundit me golin e Éder Militão, duke dhënë sinjal se ndeshja mund të përfundonte në barazim.
Por kur gjithçka po shkonte drejt ndarjes së pikëve, në skenë doli Muriqi.
Në minutën e 91-të, “Pirati” goditi me qetësi pas një kundërsulmi të shpejtë, duke vulosur një fitore të madhe për Mallorcan dhe duke tronditur seriozisht ambiciet e Realit për titull.
Ky ishte goli i 19-të i sezonit për sulmuesin kosovar në La Liga, ndërsa vetëm Kylian Mbappé ka më shumë gola këtë edicion.
Për më tepër, Muriqi ka arritur në katër gola të shënuar ndaj Real Madridit gjatë karrierës së tij në Spanjë, duke konfirmuar se është një nga kundërshtarët më të vështirë për gjigantin madrilen.
Fitorja i jep frymë të madhe Mallorcas në luftën për mbijetesë, ndërsa Real Madridi humbet një mundësi të artë për të përfituar nga përballja direkte mes rivalëve për titull.
