Parku Kombëtar “Sharri” është pranuar zyrtarisht si anëtari më i ri i Federatës së Parqeve Evropiane, EUROPARC, duke shënuar një moment historik për Kosovën në fushën e mbrojtjes së mjedisit.
Sipas Agjencisë për Mbrojtjen e Mjedisit të Kosovës, kjo është hera e parë që një park nga Kosova bëhet pjesë e këtij rrjeti prestigjioz evropian, duke forcuar praninë e vendit në nismat ndërkombëtare për ruajtjen e natyrës.
Në njoftimin e EUROPARC, Parku Kombëtar “Sharri” vlerësohet për biodiversitetin e tij të pasur, lidhjet e forta me komunitetin dhe angazhimin për zhvillim të qëndrueshëm. Ai përshkruhet si një zonë e rëndësishme për mbrojtjen e habitateve malore dhe specieve të rralla, duke përfshirë edhe ato endemike.
Strategjia e parkut për ruajtjen e biodiversitetit përfshin mbrojtjen e habitateve natyrore, mbështetjen e jetesës tradicionale në zonat përreth, zhvillimin e turizmit të qëndrueshëm dhe promovimin e edukimit mjedisor për komunitetet lokale dhe vizitorët.
Po ashtu, EUROPARC ka vlerësuar arritjet e ekipit të parkut në vitet e fundit, duke përfshirë zbulimin e specieve të reja, projektet ndërkufitare dhe bashkëpunimin me fermerët lokalë për ruajtjen e ekosistemit.
Në kuadër të këtij anëtarësimi, theksohet edhe rëndësia e ruajtjes afatgjate të biodiversitetit në Malet e Sharrit, si dhe përpjekjet për të balancuar zhvillimin ekonomik me mbrojtjen e natyrës.
Ky zhvillim pritet të rrisë dukshmërinë ndërkombëtare të Parkut Kombëtar “Sharri” dhe të krijojë mundësi të reja për bashkëpunim në nivel evropian në fushën e mjedisit dhe turizmit të qëndrueshëm.
