Presidenti i Shteteve të Bashkuara, Donald Trump, ka deklaruar se ekziston mundësia për arritjen e një marrëveshjeje me Iranin brenda një afati të shkurtër, por njëkohësisht ka paralajmëruar pasoja të rënda në rast të dështimit të negociatave.
Në një intervistë për Fox News, Trump tha se beson që një zgjidhje diplomatike mund të arrihet “deri nesër”, duke theksuar nevojën për një marrëveshje të shpejtë.
Megjithatë, ai përdori një ton të ashpër ndaj Teheranit, duke paralajmëruar për veprime të forta nëse nuk ka progres.
“Nëse nuk arrihet marrëveshje dhe shpejt, po mendoj ta shkatërroj të gjithën dhe të marrë kontrollin e naftës”, deklaroi Trump.
Në të njëjtën intervistë, ai bëri edhe një pretendim të fortë, duke thënë se SHBA-të kanë furnizuar me armë protestuesit në Iran përmes rrjeteve kurde, pa dhënë detaje konkrete mbi këtë operacion të supozuar.
Deklaratat e Trump vijnë në një moment tensionesh të larta mes SHBA-së dhe Iranit, ndërsa paralajmërimet për përshkallëzim shtojnë shqetësimet për stabilitetin në rajon dhe për ndikimin në tregjet globale të energjisë.
Pavarësisht retorikës së ashpër, presidenti amerikan la të hapur mundësinë për një marrëveshje diplomatike, duke theksuar se dritarja për negociata mbetet ende e hapur, por për një kohë shumë të kufizuar.
