Komisioni Evropian ka paralajmëruar se Rusia nuk mund të konsiderohet një partnere e besueshme, pas publikimit të dokumenteve që tregojnë për një marrëveshje bashkëpunimi mes Hungarisë dhe Moskës, pak ditë para zgjedhjeve parlamentare në këtë vend.
Reagimi i Brukselit erdhi pasi media POLITICO publikoi dokumente të siguruara nga qeveria ruse, të cilat zbulojnë se Budapesti ka negociuar një sërë marrëveshjesh bashkëpunimi me Kremlinin.
Zëvendëszëdhënësja e Komisionit Evropian, Arianna Podestà, deklaroi se qëndrimi i BE-së ndaj Rusisë mbetet i pandryshuar.
“Pikëpamjet tona janë shumë të qarta – Rusia është një partner i pabesueshëm. Këtë e ka dëshmuar veçanërisht në fushën e energjisë”, u shpreh ajo, duke shtuar se nuk do të komentojë më tej për detaje specifike të marrëveshjes.
Sipas dokumenteve të publikuara, marrëveshja e nënshkruar nga ministri i Jashtëm hungarez Péter Szijjártó përfshin bashkëpunim në disa sektorë kyç, përfshirë energjinë, industrinë, bujqësinë, shëndetësinë dhe arsimin.
Në mesin e planeve të përbashkëta përmenden zgjerimi i bashkëpunimit në energjinë bërthamore, rritja e programeve arsimore dhe kulturore, si dhe krijimi i partneriteteve të reja ndërmjet institucioneve sportive dhe universiteteve.
Këto zhvillime vijnë në një moment të ndjeshëm politik për Hungarinë, ku politika e jashtme dhe raportet me Rusinë janë kthyer në çështje kyçe në prag të zgjedhjeve parlamentare.
Kryeministri Viktor Orbán, i cili ka mbajtur lidhje të afërta me Kremlinin dhe ka kundërshtuar disa nga sanksionet e BE-së ndaj Rusisë, përballet me një sfidë të fortë nga opozita.
Sfiduesi i tij kryesor, Péter Magyar, ka fituar terren në sondazhe, ndërsa ka kritikuar qeverinë për lidhjet me Moskën. Nga ana tjetër, Orbán e ka akuzuar rivalin e tij se përfaqëson interesat e Brukselit dhe rrezikon stabilitetin energjetik të vendit.
Debati mbi orientimin gjeopolitik të Hungarisë pritet të jetë një nga faktorët vendimtarë në rezultatin e zgjedhjeve të së dielës.
