Ish-kongresmeni amerikan Eliot Engel, një ndër mbështetësit më të mëdhenj të Kosovës dhe shqiptarëve në Shtetet e Bashkuara, ka ndërruar jetë në moshën 79-vjeçare.
Lajmi për vdekjen e tij u konfirmua nga familja, e cila vlerësoi kontributin e tij shumëvjeçar në shërbim publik dhe angazhimin për paqe dhe siguri në botë.
Engel shërbeu për më shumë se tre dekada në Kongresin amerikan, duke përfaqësuar zonat e Bronx-it dhe Westchester-it nga viti 1989 deri në vitin 2021. Gjatë kësaj kohe, ai u bë një figurë kyçe në politikën e jashtme amerikane, duke udhëhequr edhe Komitetin e Punëve të Jashtme në Dhomën e Përfaqësuesve.
I njohur si një “avokat i zjarrtë i Kosovës”, Engel ishte ndër politikanët e parë amerikanë që ngriti zërin për të drejtat e shqiptarëve dhe mbështeti fuqishëm pavarësinë e Kosovës në momentet më vendimtare.
Figura të shumta politike në SHBA e kanë vlerësuar si një “kampion të të drejtave të njeriut” dhe një zë të fuqishëm për demokracinë. Kongresmeni Ritchie Torres e cilësoi atë si “një nga kampionët më të mëdhenj që Bronksi ka pasur ndonjëherë”, duke theksuar rolin e tij të veçantë për Kosovën dhe komunitetin shqiptar.
Me një karrierë mbi 40-vjeçare në shërbim publik, trashëgimia e Engel mbetet e lidhur ngushtë me mbështetjen e tij të palëkundur për lirinë, demokracinë dhe çështjen shqiptare në arenën ndërkombëtare.
