Kreu i AAK-së, Ramush Haradinaj, ka marrë pjesë në akademinë përkujtimore kushtuar Heroit të Kosovës, Agim Ramadani, ku është nderuar figura dhe sakrifica e tij në luftën për çlirim.
Haradinaj theksoi se Agim Ramadani mbetet një nga figurat më të shquara të luftës së Ushtrisë Çlirimtare të Kosovës, duke përkujtuar trimërinë dhe përkushtimin e tij deri në frymën e fundit.
Sipas tij, Ramadani, së bashku me Sali Çekaj dhe Xhemajl Fetahaj, i dhanë vulë historike Betejës së Koshares, duke e bërë atë një nga momentet më të rëndësishme dhe simbolike të luftës për liri.
Në këtë përvjetor, ai përkujtoi edhe luftëtarët e tjerë të UÇK-së që ranë në këtë betejë, duke i cilësuar si heronj të përhershëm të thyerjes së kufirit mes shqiptarëve. Mes tyre përmendi: Abush Loku, Bashkim Jasiqi, Ramiz Krasniqi, Rifat Çelaj, Arben Jusufi, Driton Veliu, Emri Curri, Harun Beka, Rifat Salihaj, Rrahman Tafa dhe Sylejman Shala.
Haradinaj theksoi se liria e Kosovës do të jetojë për aq kohë sa kujtohen dhe nderohen ata që sakrifikuan jetën për të.
“Lavdi!”, përfundoi ai.
