Në Islamabad kanë nisur zyrtarisht bisedimet për paqe mes Shteteve të Bashkuara dhe Iranit, në një proces diplomatik të ndërmjetësuar nga Pakistani.
Sipas raportimeve të agjencisë Reuters, negociatat po zhvillohen në një format trepalësh, ku pala pakistaneze luan rolin e ndërmjetësit. Ende mbetet e paqartë nëse delegacionet amerikane dhe iraniane po zhvillojnë takime direkte në të njëjtën sallë apo komunikojnë përmes ndërmjetësve.
Para nisjes së dialogut, Teherani ka vendosur dy kushte kyçe: një armëpushim të menjëhershëm në Liban dhe zhbllokimin e aseteve të ngrira jashtë vendit. Sipas autoriteteve iraniane, këto pika janë pjesë e një marrëveshjeje paraprake të arritur më herët gjatë javës.
Nga ana tjetër, presidenti Donald Trump ka mbajtur një qëndrim skeptik, duke deklaruar se Irani “nuk ka karta të forta negociuese”. Ai ka theksuar se hapja e Ngushticës së Hormuzit mbetet prioritet urgjent për Uashingtonin, ndërsa ndalimi i programit bërthamor iranian përbën pjesën më të madhe të çështjes.
Burime pakistaneze bëjnë të ditur se, pavarësisht tensioneve, takime ballë për ballë mes palëve tashmë kanë nisur, me praninë e ndërmjetësve në të njëjtën sallë.
Ndërkohë, situata në terren mbetet e brishtë. Irani ka paralajmëruar se mund të godasë çdo anije ushtarake amerikane që hyn në Ngushticën e Hormuzit, ndërsa raportohen lëvizje të shtuara të flotës amerikane në këtë zonë strategjike.
Këto bisedime konsiderohen vendimtare për përpjekjet diplomatike për t’i dhënë fund konfliktit në Lindjen e Mesme, në një moment kur çdo hap mund të përcaktojë drejtimin e situatës në rajon.
