Kina ka njoftuar një paketë të re masash për të përmirësuar marrëdhëniet me Tajvanin, në një lëvizje që vjen pas një takimi të rëndësishëm politik në Pekin.
Kreu i partisë më të madhe opozitare të Tajvanit, Cheng Li-wun nga Kuomintang (KMT), u takua me presidentin kinez Xi Jinping, ku diskutuan për paqen dhe uljen e tensioneve mes dy palëve.
Pas këtij takimi, Pekini prezantoi 10 masa të reja që synojnë lehtësimin e lidhjeve ekonomike dhe kulturore. Ndër to përfshihen rifillimi i fluturimeve direkte drejt qyteteve kineze, lehtësimi i turizmit dhe hapja për importin e disa produkteve ushqimore nga Tajvani.
Gjithashtu, Kina ka bërë të ditur se do të lejojë transmetimin e përmbajtjeve televizive tajvaneze, për sa kohë ato përmbushin kriteret e përcaktuara nga autoritetet kineze.
Një tjetër propozim përfshin ndërtimin e një ure që do të lidhte territorin kinez me ishujt tajvanezë Matsu dhe Kinmen, të cilët ndodhen pranë brigjeve të Kinës.
Megjithatë, marrëdhëniet mes dy palëve mbeten të tensionuara. Pekini vazhdon ta konsiderojë Tajvanin si pjesë të territorit të tij, ndërsa qeveria në Taipei i refuzon këto pretendime.
Ndërkohë, autoritetet tajvaneze kanë reaguar me skepticizëm ndaj këtyre masave, duke i cilësuar si “lëshime të njëanshme” që mund të fshehin qëllime politike.
Analistët vlerësojnë se kjo lëvizje e Kinës synon të rrisë ndikimin mbi opinionin publik në Tajvan, në një kohë kur tensionet ushtarake dhe politike në rajon vazhdojnë të jenë të larta.
