Inspektimi teknik i automjeteve në Evropë pritet të ndryshojë rrënjësisht, duke i dhënë fund praktikave të manipulimit të sistemeve elektronike të makinave, si çaktivizimi i valvulës EGR apo sistemit start-stop.
Sipas planeve të reja të Komisioni Evropian, një direktivë e përditësuar do të vendosë standarde shumë më të rrepta, duke kaluar nga kontrollet tradicionale mekanike në analiza të avancuara elektronike.
Deri më tani, shumica e kontrolleve fokusoheshin në elementë bazikë si frenat apo emetimi i tymit. Por me teknologjinë e re, inspektorët do të kenë qasje direkte në sistemet elektronike të automjetit përmes portit diagnostikues OBD.
Ky ndryshim vjen pasi shumë shoferë kanë përdorur pajisje të lira për të modifikuar parametrat e makinës, duke:
- Çaktivizuar sistemin start-stop
- Fikur valvulën EGR për të shmangur filtrimin e emetimeve
- Rritur fuqinë e motorit
- Manipuluar sistemet e sigurisë
Këto ndërhyrje deri tani shpesh kalonin pa u zbuluar gjatë kontrollit teknik.
Me rregullat e reja, inspektimi do të përfshijë:
- Kontroll të plotë të elektronikës së automjetit
- Verifikim nëse sistemet e sigurisë janë aktive
- Zbulim të manipulimeve në emetime dhe performancë
- Përdorim të sistemit OBFCM për të krahasuar të dhënat reale të konsumit dhe ndotjes
Kjo do të thotë se çdo ndërhyrje e paautorizuar në makinë do të identifikohet menjëherë, duke e bërë pothuajse të pamundur kalimin e inspektimit me “truke”.
Ndryshimet pritet të hyjnë në fuqi gradualisht brenda 1-2 viteve të ardhshme, ndërsa implementimi i plotë do të përfundojë para vitit 2030.
Ky është një mesazh i qartë për drejtuesit: epoka e manipulimeve të fshehta po mbaron, dhe standardet e reja synojnë rritjen e sigurisë rrugore dhe uljen e ndotjes në të gjithë Evropën.
