Kryeministri i Kosovës, Albin Kurti, ka deklaruar se vendi po synon të shndërrohet në një qendër inovacioni dhe zhvillimi teknologjik, duke vënë në fokus sektorët e Teknologjisë së Informacionit dhe shërbimeve BPO si motorë kryesorë të rritjes ekonomike.
Duke folur në tryezën e organizuar nga ABSL Kosovo me temën “Kosova: Nga një destinacion pranë bregut në një kufi inovacioni”, Kurti theksoi se këta sektorë aktualisht punësojnë mbi 47 mijë persona dhe po shënojnë rritjen më të shpejtë në ekonominë vendore.
Ai nënvizoi se Qeveria e Kosovës e ka bërë zhvillimin e këtij sektori prioritet strategjik, duke përfshirë atë në Strategjinë e Punësimit 2024–2028, me qëllim krijimin e vendeve të reja të punës për të rinjtë. Sipas tij, janë ndërmarrë hapa konkretë si rishikimi i kurrikulave arsimore në bashkëpunim me industrinë, krijimi i stimujve fiskalë për investitorët dhe thjeshtimi i procedurave administrative.
Kurti bëri të ditur se në Kosovë janë aktive mbi 11 mijë biznese në sektorin digjital dhe të shërbimeve profesionale, me një qarkullim që ka arritur në rreth 2 miliardë euro gjatë vitit 2025, duke shënuar një rritje mesatare prej 16 për qind. Ai shtoi se 78 për qind e këtyre kompanive operojnë në tregjet ndërkombëtare, kryesisht në vendet gjermanofolëse.
Kryeministri theksoi gjithashtu se pasuria më e madhe e Kosovës mbeten të rinjtë, duke e cilësuar vendin si një nga popullsitë më të reja në Evropë, me potencial të madh në fushën e teknologjisë dhe inovacionit.
Në fjalën e tij, ai vuri në pah edhe përparimet në infrastrukturën digjitale, duke përmendur mbulimin e plotë me internet broadband dhe zhvillimin e rrjeteve 5G në pjesën më të madhe të territorit.
Kurti theksoi se synimi i Kosovës nuk është më të mbetet vetëm një destinacion me kosto të ulët për shërbime, por të shndërrohet në një vend ku zhvillohet inovacioni dhe ku kompanitë ndërkombëtare investojnë për cilësi dhe bashkëpunim afatgjatë.
Ai përfundoi duke theksuar se ky është një proces që tashmë ka nisur dhe se çdo vend pune i ri dhe çdo investim përbën një hap drejt transformimit ekonomik të vendit.
