Kryetari i Lidhja Demokratike e Kosovës, Lumir Abdixhiku, ka bërë të ditur se partia që ai drejton ka arritur dakordim politik për të garuar së bashku me Vjosa Osmani në zgjedhjet e parakohshme parlamentare të 7 qershorit.
Pas mbledhjes së kryesisë së LDK-së, Abdixhiku deklaroi se vendimi për bashkëpunim është mbështetur nga strukturat drejtuese të partisë dhe se të shtunën do të thirret Këshilli i Përgjithshëm për të formalizuar këtë marrëveshje. Ai theksoi se ekziston vullnet i plotë për një “bashkim të madh” dhe për një listë të përbashkët zgjedhore.
Sipas tij, procesi është në fazën përfundimtare dhe pritet që në ditët në vijim të përmbyllen edhe diskutimet me Osmanin, për t’u vulosur më pas përmes votimit formal në organet e partisë.
Abdixhiku mohoi gjithashtu raportimet për kushte nga ana e Osmanit, duke theksuar se bashkëpunimi po ndërtohet mbi mirëbesim dhe vizion të përbashkët politik. “Nuk kemi folur për kushte. Ky është një raport i bazuar në besim dhe në nevojën për bashkim”, u shpreh ai.
Ai shtoi se nuk ka dilema sa i përket rolit të Osmanit në këtë bashkëpunim, duke e cilësuar atë si kandidaten më të duhur për presidente të Kosovës edhe në të ardhmen. Sipas tij, renditja në listë nuk është çështje thelbësore, ndërsa prioritet mbetet bashkimi i elektoratit dhe ofrimi i një alternative të përbashkët për qytetarët.