Të paktën 39 persona janë vrarë në sulmet e reja të Izraeli ndaj Libani, në një prej përshkallëzimeve më të rënda që nga nisja e armëpushimit tre-javor mes Izraelit dhe Hezbollah.
Sulmet ajrore izraelite goditën disa zona në jug të Libanit, përfshirë qytetin Saksakiyeh, ku sipas Ministrisë së Shëndetësisë së Libanit humbën jetën shtatë persona, mes tyre edhe një vajzë, ndërsa 15 të tjerë u plagosën, përfshirë fëmijë.
Ushtria izraelite deklaroi se kishte goditur “terroristë të Hezbollahut” që vepronin brenda një objekti ushtarak në atë zonë, por shtoi se po shqyrton raportimet për viktima civile.
Ndërkohë, një tjetër sulm në qytetin Nabatieh goditi një motoçikletë ku ndodheshin një shtetas sirian dhe vajza e tij 12-vjeçare.
Sipas autoriteteve libaneze, droni izraelit sulmoi disa herë radhazi, duke vrarë babanë, ndërsa vajza mbeti rëndë e plagosur dhe iu nënshtrua operacionit.
Sulme u raportuan edhe në qytetin Saadiyat, rreth 20 kilometra në jug të Bejrutit, jashtë zonave tradicionale të ndikimit të Hezbollahut.
Nga ana tjetër, Hezbollahu njoftoi se ka kryer sulme me dronë ndaj objektivave ushtarake në veri të Izraelit, si përgjigje ndaj bombardimeve izraelite.
Ushtria izraelite konfirmoi se disa dronë shpërthyes u lëshuan drejt territorit izraelit, duke plagosur disa ushtarë rezervistë.
Pavarësisht armëpushimit të ndërmjetësuar nga Shtetet e Bashkuara të Amerikës, përplasjet mes palëve kanë vazhduar pothuajse çdo ditë.
Sipas kushteve të armëpushimit, Izraeli rezervon të drejtën për të ndërhyrë kundër “sulmeve të afërta ose të vazhdueshme”, ndërsa ushtria izraelite tha se kishte goditur mbi 85 objektiva të Hezbollahut vetëm gjatë 24 orëve të fundit.
Ligjvënësi i Hezbollahut, Hassan Fadlallah, paralajmëroi për “një fazë të re” të konfliktit, duke deklaruar se grupi nuk do të pranojë kthim në situatën para 2 marsit.
Ndërkohë, përfaqësues të Libanit dhe Izraelit pritet të zhvillojnë javën e ardhshme një raund të ri bisedimesh direkte në Uashington, mes përpjekjeve ndërkombëtare për të shmangur zgjerimin e luftës në rajon.
