Partia Demokratike e Kosovës ka publikuar listën e kandidatëve për deputetë për zgjedhjet e 7 qershorit. Bartës i listës është kreu i PDK-së, Bedri Hamza.
Partia Demokratike e Kosovës e ka bërë publike listën me 110 kandidatë për deputetë për zgjedhjet e jashtëzakonshme parlamentare të 7 qershorit.
Kryetari i PDK-së, Bedri Hamza tha se “mbi 50% e listës së kandidatëve janë prurje të reja”.
“Kjo është lista jonë. Profesionistë të dëshmuar në punë, në angazhim publik dhe në shërbim ndaj qytetarëve. Në këtë listë ka energji të re, por edhe përvojë. Njerëz që besojnë se Kosova meriton më shumë dhe më mirë. Mbi 50% e listës së kandidatëve janë prurje të reja, si pjesë e përkushtimit të PDK-së për t’u dhënë hapësirë kuadrove të rinj”, shkroi ai në një postim në Facebook.
“Përveç listës, në ditët në vijim PDK do ta prezantojë edhe programin më serioz dhe më të përgjegjshëm për shtetin dhe qytetarët. Më 7 qershor, ju do ta keni edhe një mundësi për të vendosur për të ardhmen e vendit, ndërsa thirrja ime është e përzemërt: Besoni në Kosovë!”, shtoi Hamza.
