Trajneri i Barcelonës, Hansi Flick, ka komentuar largimin e Robert Lewandowskit nga klubi, duke e cilësuar si një vendim të drejtë si për sulmuesin polak, ashtu edhe për vetë skuadrën katalanase.
Në konferencën për shtyp para ndeshjes ndaj Real Betisit, vëmendja kryesore nuk ishte te sfida e La Liga-s, por te lamtumira e njërit prej emrave më të mëdhenj të ekipit.
Flick konfirmoi se Lewandowski tashmë i ka dhënë lamtumirën skuadrës.
“Biseda shkoi shumë mirë. Ai foli me ekipin dhe u përshëndet me të gjithë. Kemi kaluar një periudhë fantastike bashkë. I thashë se kam fituar çdo titull me të – nëntë në total. Ka qenë privilegj të punoj me të,” deklaroi tekniku gjerman.
Trajneri i Barcelonës e përshkroi Lewandowskin si model profesionalizmi.
“Ai është shembull për të gjithë. Kujdeset maksimalisht për veten dhe kjo është arsyeja pse vazhdon të luajë në nivel kaq të lartë. Tani dëshiron një ndryshim, dëshiron të ecë përpara. Mendoj se ky është vendimi më i mirë si për të, ashtu edhe për klubin.”
Flick pranoi se zëvendësimi i një lojtari të kalibrit të Lewandowskit nuk do të jetë aspak i lehtë.
“Nuk është e thjeshtë të gjesh dikë si Roberti. Është një profesionist fantastik dhe njeri i shkëlqyer. Sigurisht që do të na mungojë, por futbolli kërkon rinovim dhe ne duhet ta rindërtojmë skuadrën.”
Duke folur për atmosferën në dhomat e zhveshjes, Flick theksoi se sekreti i suksesit është komunikimi i sinqertë dhe respekti reciprok.
“Unë i trajtoj lojtarët me respekt dhe kërkoj të njëjtën gjë prej tyre. Ndonjëherë duhet të marrësh vendime që nuk u pëlqejnë të gjithëve, por ato bëhen për të mirën e ekipit. Gjëja më e rëndësishme është të jemi të sinqertë me njëri-tjetrin.”
Largimi i Lewandowskit shënon fundin e një epoke të rëndësishme te Barcelona, ndërsa klubi tashmë duket se po hyn në një fazë të re rindërtimi.
