Pakistani po vazhdon përpjekjet diplomatike për uljen e tensioneve mes SHBA-së dhe Iranit, ndërsa Sekretari amerikan i Shtetit, Marco Rubio, ka deklaruar se ka “shenja të lehta progresi” në negociatat për paqe.
Shefi i ushtrisë së Pakistanit, Marshalli i Fushës Asim Munir, ka mbërritur në Teheran për zhvillimin e bisedimeve të reja me autoritetet iraniane. Ai u prit nga ministri i Brendshëm i Iranit, Eskandar Momeni, si dhe nga homologu i tij pakistanez Mohsin Naqvi, i cili kishte zhvilluar vizita në Teheran edhe gjatë javës së kaluar.
Megjithatë, autoritetet iraniane kanë treguar kujdes lidhur me pritshmëritë për rezultate të menjëhershme. Zëdhënësi i Ministrisë së Jashtme të Iranit, Esmaeil Baqaei, deklaroi se vizita nuk nënkupton një “pikë kthese” në negociata.
“Nuk kemi arritur ende në një fazë vendimtare. Ekzistojnë ende mosmarrëveshje të thella dhe të gjera”, deklaroi Baqaei, sipas agjencisë iraniane ISNA.
Nga ana tjetër, gjatë takimit të ministrave të Jashtëm të NATO-s në Suedi, Marco Rubio tha se ka pasur lëvizje të vogla pozitive në negociata.
“Nuk dua ta ekzagjeroj situatën, por ka pasur disa zhvillime dhe kjo është diçka pozitive”, u shpreh ai.
Deklaratat e Rubios vijnë pasi presidenti amerikan Donald Trump njoftoi se ka shtyrë një operacion të mundshëm ushtarak ndaj Iranit, duke argumentuar se aktualisht janë duke u zhvilluar “negociata serioze”.
Trump ka paralajmëruar prej javësh se armëpushimi i arritur në mesin e muajit prill mund të dështojë nëse nuk arrihet një marrëveshje me Teheranin.
“Kemi të bëjmë me një grup shumë të vështirë njerëzish. Nëse nuk ka ndryshime, presidenti ka qenë i qartë se ekzistojnë edhe alternativa të tjera”, deklaroi Rubio.
Ndërkohë, ministri i Jashtëm iranian, Abbas Araghchi, tha se Teherani mbetet i përkushtuar ndaj diplomacisë, pavarësisht mosbesimit ndaj Uashingtonit.
“Pavarësisht dyshimeve të forta ndaj SHBA-së, Republika Islamike e Iranit po hyn në këtë proces me seriozitet dhe përgjegjësi për të arritur një zgjidhje të drejtë”, deklaroi ai.
Ngushtica e Hormuzit mbetet pika kryesore e tensionit
Një nga çështjet më të ndjeshme mbetet situata në Ngushticën e Hormuzit, një nga rrugët më strategjike për transportin global të naftës dhe gazit.
Autoritetet iraniane kanë konfirmuar se statusi i ngushticës dhe masat amerikane ndaj porteve iraniane janë pjesë e diskutimeve aktuale.
Sipas Komandës Qendrore të SHBA-së, Uashingtoni ka ridrejtuar dhjetëra anije tregtare dhe ka kufizuar aktivitetin në disa porte iraniane që nga mesi i muajit prill.
Rubio deklaroi se në rast dështimi të negociatave duhet të ekzistojë edhe një “plan alternativ”.
“Duhet të ketë një plan B nëse nuk arrihet marrëveshje. Dikush do të duhet të veprojë”, tha ai.
Ndërkohë, Bashkimi Evropian ka zgjeruar regjimin e sanksioneve ndaj Iranit, duke synuar individët e përfshirë në bllokimin e rrugëve detare, të cilin Brukseli e konsideron në kundërshtim me të drejtën ndërkombëtare.
