Një marrëveshje e mundshme mes Shteteve të Bashkuara të Amerikës dhe Iranit mund të hapë rrugën për zgjatjen e një armëpushimi 60-ditor dhe ndërprerjen e operacioneve ushtarake në disa fronte të Lindjes së Mesme, përfshirë edhe Libanin, raportojnë burime të cituara nga CBS News.
Sipas një draft-memorandumi të mirëkuptimit, i cili pritet të shqyrtohet nga autoritetet iraniane, dokumenti përmban disa pika kyçe që synojnë uljen e tensioneve dhe krijimin e një kuadri të ri diplomatik në rajon.
Ndër masat e propozuara përfshihen zgjatja e armëpushimit aktual me 60 ditë, hapja e menjëhershme e Ngushticës së Hormuzit nga Irani dhe rikthimi i lundrimit detar në nivelet para konfliktit brenda një periudhe prej 30 ditësh.
Drafti parashikon gjithashtu një deklaratë të përbashkët mes SHBA-së, Iranit dhe aleatëve të tyre për ndërprerjen e menjëhershme dhe të përhershme të operacioneve ushtarake në rajon, përfshirë Libanin. Dokumenti thekson se asnjëra palë nuk do të nisë veprime ushtarake apo kërcënime me përdorim force, ndërsa Irani do të riafirmojë angazhimin për të mos zhvilluar armë bërthamore.
Një prej pikave më të rëndësishme lidhet edhe me rezervat iraniane të uraniumit të pasuruar, për të cilat parashihet krijimi i një mekanizmi të dakorduar nga të dyja palët për menaxhimin ose largimin e tyre.
Sipas raportimeve, zhbllokimi i aseteve iraniane të ngrira dhe lehtësimi i sanksioneve do të kushtëzohen me respektimin e marrëveshjes nga Teherani.
Një zyrtar i lartë amerikan ka konfirmuar për CBS News një pjesë të elementeve të draftit, megjithëse nuk ka komentuar mbi ndalimin e operacioneve ushtarake në Liban dhe propozimin për armëpushim 60-ditor.
Ndërkohë, përpjekjet diplomatike janë intensifikuar ditët e fundit. Ministri i Jashtëm iranian ndodhet në Doha për takime me zyrtarë të Katarit, ndërsa Marco Rubio ka deklaruar se SHBA-ja do t’i japë përparësi diplomacisë para shqyrtimit të opsioneve të tjera.
Nga ana tjetër, Donald Trump ka reaguar përmes një postimi në rrjetet sociale duke theksuar se negociatat “po ecin mirë”, por ka paralajmëruar pasoja në rast të dështimit të tyre.
“Ose do të ketë një marrëveshje të madhe për të gjithë, ose nuk do të ketë fare marrëveshje”, ka shkruar Trump.
Burimet bëjnë të ditur se diskutimet në Doha janë fokusuar kryesisht te Ngushtica e Hormuzit, rezervat iraniane të uraniumit të pasuruar dhe mundësia e zhbllokimit të fondeve iraniane të ngrira jashtë vendit. Ndërkohë, autoritetet iraniane kanë deklaruar se memorandumi përfshin 14 pika dhe fokusohet në përfundimin e konfliktit dhe të bllokadës detare amerikane.
