Rreth 500 mijë ushtarë rusë besohet se janë vrarë që nga fillimi i pushtimit të plotë të Ukrainës nga Rusia në vitin 2022, deklaroi drejtoresha e agjencisë britanike të inteligjencës dhe sigurisë kibernetike GCHQ, Anne Keast-Butler.
Shifra u publikua më 27 maj gjatë një fjalimi të saj, ndërsa përputhet edhe me vlerësime të tjera të bëra nga qeveri perëndimore dhe organizata të pavarura.
Keast-Butler paralajmëroi se Rusia vazhdon të përbëjë kërcënim për Evropën, duke “shënjestruar pareshtur infrastrukturën kritike, proceset demokratike, zinxhirët e furnizimit dhe besimin publik”.
Ajo theksoi se autoritetet britanike janë të fokusuar në mbrojtjen e kabllove dhe tubacioneve nënujore, si dhe në pengimin e përpjekjeve ruse për të anashkaluar sanksionet perëndimore dhe për të kontrabanduar teknologji.
“Ndërsa mbetemi të palëkundur në mbështetjen tonë për Ukrainën, Putini po zmbrapset në fushëbetejë, me informacione të reja që tregojnë se pothuajse gjysmë milioni ushtarë rusë janë vrarë që nga fillimi i konfliktit”, deklaroi ajo.
Sipas raportit vjetor të inteligjencës ushtarake holandeze, Rusia ka pësuar rreth 1.2 milion humbje totale në luftë, përfshirë mbi 500 mijë të vrarë.
Ndërkohë, mediat ruse në ekzil, Mediazona dhe Meduza, bazuar në dokumente zyrtare të trashëgimisë, vlerësojnë se të paktën 352 mijë ushtarë rusë janë vrarë që nga viti 2022.
Raportet tregojnë se forcat ruse kanë vazhduar ofensivën me humbje shumë të mëdha njerëzore, ndërsa Ukraina ka arritur të frenojë avancimin rus në disa zona falë përdorimit intensiv të dronëve dhe taktikave të reja ushtarake.
Presidenti finlandez, Alexander Stubb, deklaroi muajin e kaluar se Rusia po humb rreth 35 mijë ushtarë në muaj dhe se shumica e tyre vriten nga sulmet me dronë.
“Raporti i humbjeve aktualisht është një ushtar ukrainas për pesë ushtarë rusë”, tha ai.
Megjithatë, edhe Ukraina po përballet me vështirësi në mobilizimin e trupave dhe zëvendësimin e njësive të lodhura në vijën e frontit.
Sipas vlerësimeve perëndimore, humbjet totale të Ukrainës llogariten mes 500 mijë dhe 600 mijë ushtarëve, ndërsa ekspertët paralajmërojnë se deri në verë numri total i viktimave nga të dyja palët mund të kalojë shifrën prej 2 milionë.Burimi: REL.
