Kryetari i Komunës së Tetovës, Bilall Kasami, ka pritur të shtunën ushtruesen e detyrës së presidentes së Kosovës, Albulena Haxhiu, në një takim ku u diskutua për projektet e përbashkëta ndërmjet Kosovës dhe Maqedonisë së Veriut, marrëdhëniet dypalëshe dhe zhvillimet politike në prag të zgjedhjeve parlamentare të 7 qershorit në Kosovë.
Pas takimit, Kasami bëri të ditur se bisedimet janë fokusuar në forcimin e bashkëpunimit institucional dhe avancimin e projekteve me interes të përbashkët për të dy vendet.
“Biseduam për projektet e përbashkëta mes dy qeverive tona, marrëdhëniet e shkëlqyera mes shteteve tona dhe lidhjet e ngushta të shqiptarëve në dy anët e kufirit”, ka deklaruar ai.
Sipas Kasamit, pjesë e diskutimeve kanë qenë edhe zgjedhjet parlamentare në Kosovë, rëndësia e stabilitetit politik dhe nevoja që institucionet e ardhshme të ndërtohen mbi vullnetin e qytetarëve të shprehur përmes votës.
Në këtë kuadër, kryetari i Tetovës ka shprehur mbështetjen për vazhdimin e bashkëpunimit me institucionet e Kosovës pas formimit të qeverisë së re.
“Do të jemi afër qeverisë së re në Kosovë dhe do ta vazhdojmë e thellojmë bashkëpunimin e shkëlqyer”, theksoi Kasami.
Takimi konsiderohet si një konfirmim i marrëdhënieve të ngushta ndërmjet Kosovë dhe Maqedonia e Veriut, ndërsa vjen në një periudhë të rëndësishme politike për Kosovën, ku fokusi mbetet te procesi zgjedhor, stabiliteti institucional dhe bashkëpunimi rajonal.
