Autoritetet britanike, në bashkëpunim me Interpol Tiranën, kanë arrestuar në Mbretërinë e Bashkuar një shtetas shqiptar të kërkuar ndërkombëtarisht për trafik droge në Kosovë. Operacioni vjen pas më shumë se një dekade kërkimesh ndërkufitare.
Sipas dokumenteve të Gjykatës së Ekstradimeve në Westminster (City of Westminster Magistrates’ Court), i arrestuari për qëllime ekstradimi është Gëzim Çela, 37 vjeç.
Akuzat: trafikimi i 49 kilogramëve kanabis
Autoritetet shqiptare kanë lëshuar urdhër-arrest ndërkombëtar ndaj tij, nën dyshimin se më 15 tetor 2015, Çela ka qenë pjesë e një grupi kriminal së bashku me disa persona të tjerë, të identifikuar si Fran Merdhoci, Alfred Mikeli, Arif Çela dhe Victor Lekgegaj.
Sipas dosjes hetimore, grupi akuzohet për trafikimin e 49 kilogramëve kanabis drejt Kosovës.
Seanca e ekstradimit më 4 qershor 2026
Gjykata britanike ka caktuar seancën e radhës për procedurën e ekstradimit më 4 qershor 2026, në orën 10:00.
Ndërkohë, Drejtoria e Marrëdhënieve me Jashtë në Ministrinë e Drejtësisë në Tiranë ka afat 40 ditë për të dorëzuar dosjen e plotë të ekstradimit, së bashku me garancinë e nënshkruar nga ministri i Drejtësisë, që i garanton të drejtën e rigjykimit, pasi ai është dënuar në mungesë.
Gjykata britanike ka vlerësuar gjithashtu se i dyshuari nuk mund të përfitojë lirim me kusht gjatë procesit të ekstradimit, për shkak të natyrës së rëndë të veprës penale.
Procesi pritet të vijojë në javët në vazhdim, ndërsa vendimi përfundimtar do të përcaktojë nëse Çela do t’i dorëzohet autoriteteve shqiptare.Burimi:TCH.
