Këngëtarja me famë botërore Dua Lipa dhe aktori britanik Callum Turner kanë kurorëzuar zyrtarisht lidhjen e tyre me martesë në një ceremoni civile të mbajtur në Londër.
Çifti u martua në Bashkinë e Old Marylebone, në një atmosferë intime dhe private, në praninë e familjarëve dhe miqve më të afërt. Ceremonia u karakterizua nga thjeshtësia dhe eleganca, larg vëmendjes së tepruar mediatike.
Dua Lipa u paraqit me një veshje të bardhë elegante, të kombinuar me kapelë dhe doreza, ndërsa Callum Turner kishte zgjedhur një kostum klasik blu të errët, të shoqëruar me kravatë.
Sipas raportimeve të mediave britanike, ceremonia në Londër përbënte aktin zyrtar dhe ligjor të martesës së çiftit, ndërsa festimet kryesore pritet të zhvillohen në Palermo të Sicilisë.
Burime pranë çiftit bëjnë të ditur se ceremonia festive do të zgjasë disa ditë dhe do të mbledhë familjarë, miq dhe personalitete të njohura nga bota e muzikës dhe kinemasë.
Martesa e Dua Lipës dhe Callum Turner vjen pas një periudhe të gjatë spekulimesh dhe interesimi të madh nga publiku dhe mediat ndërkombëtare për marrëdhënien e tyre, e cila tashmë është kurorëzuar me martesë.
