Ivanka Trump ka ndarë detaje të reja mbi projektin e saj ambicioz turistik në Ishulli i Sazanit, duke e cilësuar atë si një sfidë personale dhe profesionale që shkon përtej interesit të zakonshëm biznesor.
Në një intervistë të gjatë me David Senra, vajza e presidentit amerikan Donald Trump tregoi se zbulimi i Sazanit ndodhi rastësisht gjatë një udhëtimi me varkë në Mesdhe.
“Notuam drejt ishullit, u ngjitëm zbathur deri në majë dhe mbetëm të mahnitur. Ai vend na ka mbetur në mendje që prej asaj dite”, rrëfeu ajo.
“Për mua është më shumë sfidë sesa biznes”
Trump shpjegoi se projekti që po zhvillohet në Sazan dhe në zonën e Zvërnec synon të ruajë karakterin natyror të territorit dhe të ndërtojë një model zhvillimi që respekton peizazhin unik të zonës.
Sipas saj, arkitektura duhet të integrohet natyrshëm me mjedisin dhe jo ta dominojë atë.
“Për mua nuk është biznes, pavarësisht përmasës së projektit. Ndihet më shumë si një sfidë. Është kulmi i gjithë përvojës sime në pasuritë e paluajtshme dhe i reflektimeve të mia për mënyrën se si duan të jetojnë njerëzit sot”, deklaroi Trump.
Ajo shtoi se projekti përfshin jo vetëm ishullin e Sazanit, por edhe një pjesë të konsiderueshme të vijës bregdetare përballë tij, me laguna, plazhe dhe hapësira natyrore që synohen të zhvillohen me kujdes të veçantë.
Bashkëpunim me arkitektë të njohur ndërkombëtarë
Ivanka Trump bëri të ditur se po bashkëpunon me disa nga arkitektët më të njohur ndërkombëtarë për të krijuar një projekt që kombinon estetikën, funksionalitetin dhe respektin për natyrën.
Ajo theksoi se projekte të kësaj përmase kërkojnë vite të tëra pune dhe planifikimi.
“Kur arrin të bashkosh një arkitekturë me kuptim, të bukur dhe të menduar mirë me një hapësirë shumë funksionale, atëherë krijon diçka të veçantë”, tha ajo.
“Po lexoj shkrimtarët shqiptarë për të kuptuar vendin”
Një pjesë e rëndësishme e intervistës iu kushtua edhe përpjekjeve të saj për të njohur më mirë Shqipërinë dhe kulturën shqiptare.
Trump tha se po lexon autorë shqiptarë dhe literaturë mbi historinë e vendit për të krijuar një lidhje më të thellë me vendin ku po investon.
“Po lexoj shkrimtarët më të mirë shqiptarë dhe po përpiqem ta kuptoj vendin përmes syve të tyre. Nuk mund t’i imponohesh një vendi apo një kulture. Duhet fillimisht ta kuptosh atë”, u shpreh ajo.
Një nga investimet më të mëdha turistike në Shqipëri
Projekti i lidhur me familjen e Jared Kushner përfshin zhvillimin e një resorti ultra-luksoz në Ishullin e Sazanit dhe një kompleks turistik në Zvërnec.
Investimi po realizohet nga kompania Zvërnec South Adriatic Development dhe është konsideruar një nga projektet më të mëdha turistike të planifikuara ndonjëherë në Shqipëri.
Në fund të vitit 2024, projekti fitoi statusin e investitorit strategjik nga qeveria shqiptare, ndërsa ka ngjallur interes të madh ndërkombëtar, por edhe debate lidhur me ndikimin që mund të ketë në një nga zonat më të paprekura dhe më të rëndësishme natyrore të bregdetit shqiptar.
