Ministri në detyrë i Punëve të Brendshme, Xhelal Sveçla, ka deklaruar se incizimet e kamerave të sigurisë që lidhen me rastin e sulmit ndaj zëvendësministrit në detyrë të Financave, Hysni Mehani, ishin fshirë fillimisht, por janë rikthyer më pas nga ekspertët e forenzikës dhe tashmë ndodhen në duart e Prokurorisë.
Duke folur në emisionin “Debat Plus”, Sveçla tha se pajisja DVR ku ruheshin pamjet e sigurisë ishte pastruar pas incidentit, por ekspertiza forenzike ka arritur të rikuperojë materialin.
“Janë video të cilat në fazën fillestare janë shlyer nga DVR-ja. Forenzika i ka kthyer dhe Prokuroria i ka në dorë”, deklaroi Sveçla.
Pretendon se pamjet tregojnë përfshirjen e Sami Lushtakut
Sipas ministrit në detyrë, nga raporti i incizimeve që ai ka parë, shihet qartë përfshirja e kryetarit të Komunës së Skenderajt, Sami Lushtaku, në incidentin që ndodhi në një lokal në Skenderaj.
Sveçla tha se Lushtaku e ka mohuar përfshirjen gjatë deklarimit në polici, por sipas tij, pamjet e rikuperuara tregojnë të kundërtën.
Ai pretendoi gjithashtu se ka pasur përpjekje për të eliminuar provat materiale të rastit.
“Kanë tentuar bashkë me pronarin e lokalit t’i fshijnë incizimet dhe patjetër që edhe pronari i lokalit duhet të ndiqet penalisht për dëmtim të provave”, u shpreh Sveçla.
“Sulmi ndodhi në tavolinë”
Sipas Sveçlës, pamjet e kamerave tregojnë se Mehani është sulmuar teksa ndodhej në tavolinë, nga Lushtaku dhe persona të tjerë që ndodheshin në shoqërinë e tij.
Lidhur me angazhimin e Njësisë Speciale të Policisë së Kosovës në këtë rast, ministri në detyrë tha se veprimet e policisë kanë qenë të zakonshme dhe në përputhje me vlerësimet operacionale të autoriteteve të rendit.
“Nuk shoh asgjë të jashtëzakonshme që Policia e Kosovës të kryejë detyrat e saj sipas vlerësimeve të veta”, deklaroi ai.
Rasti ndodhi më 14 maj
Incidenti ndodhi më 14 maj 2026 në Skenderaj, ku Hysni Mehani dhe aktivisti Bahri Zabeli raportuan se ishin sulmuar fizikisht teksa ndodheshin në një kafene në qytet.
Pas ngjarjes, ata akuzuan Sami Lushtakun dhe persona të afërt me të për sulmin. Të dy morën trajtim mjekësor për lëndimet e pësuara, ndërsa Lushtaku u intervistua nga Policia e Kosovës një ditë më vonë.
Hetimet për rastin janë në vazhdim, ndërsa Prokuroria pritet të vlerësojë provat e siguruara, përfshirë incizimet e rikuperuara nga ekspertiza forenzike.
