Gjermania nuk ka arritur të sigurojë një vend të përkohshëm në Këshillin e Sigurimit të Kombeve të Bashkuara për mandatin e ardhshëm dyvjeçar, duke pësuar një humbje të papritur në votimin e zhvilluar në Asamblenë e Përgjithshme të OKB-së.
Berlini garonte me Austrinë dhe Portugalinë për dy vendet e rezervuara për grupin “Evropa Perëndimore dhe të Tjerët”, por nuk arriti të sigurojë mbështetjen e nevojshme nga shtetet anëtare.
Sipas rezultateve të votimit, Portugalia mori 134 vota, Austria 131 vota, ndërsa Gjermania mbeti në vendin e tretë me 104 vota. Për t’u zgjedhur në Këshillin e Sigurimit kërkohej mbështetja e dy të tretave të Asamblesë së Përgjithshme.
Menjëherë pas shpalljes së rezultateve, ministri i Jashtëm gjerman, Johann Wadephul, e cilësoi rezultatin si “një zhgënjim të vërtetë”. Ai kishte udhëtuar në Nju Jork për votimin dhe kishte deklaruar më herët se Gjermania ishte e gatshme të merrte përgjegjësi në një nga organet më të rëndësishme të OKB-së për ruajtjen e paqes dhe sigurisë ndërkombëtare.
Pavarësisht se është kontribuuesi i dytë më i madh financiar në OKB dhe kishte zhvilluar një fushatë intensive diplomatike, Gjermania nuk arriti të sigurojë mbështetjen e mjaftueshme. Sipas raportimeve nga Nju Jorku, Rusia kishte zhvilluar lobim aktiv kundër kandidaturës gjermane, në një kohë kur Berlini vazhdon të mbështesë fuqishëm Ukrainën përballë agresionit rus.
Pas rezultatit reagoi edhe kancelari gjerman, Friedrich Merz, i cili tha se vendi kishte kandiduar me bindje dhe seriozitet, por nuk arriti objektivin e synuar.
“Ky rezultat nuk ndryshon rolin e Gjermanisë në Kombet e Bashkuara. Ne do të vazhdojmë të mbetemi një partner i besueshëm dhe një mbështetës i fortë i rendit shumëpalësh ndërkombëtar”, deklaroi Merz.
Edhe ministri Wadephul pranoi se disa nga qëndrimet e qarta të Gjermanisë në politikën e jashtme mund të kenë ndikuar në rezultatin përfundimtar. Ai veçoi mbështetjen e vazhdueshme për Ukrainën, duke theksuar se Moska nuk dëshironte një zë të tillë në Këshillin e Sigurimit. Sipas tij, edhe pozicioni tradicional pro Izraelit mund t’i ketë kushtuar Berlinit mbështetje nga disa vende anëtare të OKB-së.
Rezultati ka nxitur reagime edhe në politikën e brendshme gjermane. Deputeti konservator Jürgen Hardt e cilësoi votimin si një lajm të trishtë për diplomacinë gjermane, ndërsa përfaqësues të Partisë së Gjelbër kritikuan qeverinë e Merz, duke argumentuar se Berlini ka humbur ndikim në çështjet klimatike dhe ka reduktuar ndihmën ndërkombëtare për zhvillim, faktorë që sipas tyre kanë ndikuar negativisht në mbështetjen ndërkombëtare.
Këshilli i Sigurimit i OKB-së përbëhet nga 15 anëtarë, ku pesë vende – Shtetet e Bashkuara, Britania e Madhe, Franca, Rusia dhe Kina – gëzojnë statusin e anëtarëve të përhershëm me të drejtë vetoje. Vendimet dhe rezolutat e këtij organi janë të vetmet akte të OKB-së që kanë fuqi detyruese për shtetet anëtare.
Gjermania ka qenë për herë të fundit anëtare jo e përhershme e Këshillit të Sigurimit gjatë periudhës 2019–2020.
