Policia e Kosovës ka arrestuar një person në Ferizaj, i dyshuar për “mbajtje në pronësi, kontroll ose posedim të paautorizuar të armës apo mjetit të rrezikshëm”, pas një incidenti të raportuar në rrugën “Shaqir Hasani”.
Sipas njoftimit zyrtar, më 04.06.2026, Stacioni Policor në Ferizaj ka pranuar informatë për një person që po shkaktonte shqetësime në rrugë, nën ndikimin e alkoolit.
Gjatë ndërhyrjes së njësive policore dhe ndalimit të tij, tek i dyshuari është gjetur dhe konfiskuar një mjet i mprehtë (thikë).
Personi është arrestuar dhe shoqëruar në stacionin policor nga njësitet reaguese. Pas testimit me alkooltest, ai ka rezultuar me 0.79 promila alkool në gjak.
Me vendim të prokurorit të shtetit, ndaj tij është iniciuar rasti për posedim të paautorizuar të armës apo mjetit të rrezikshëm, ndërsa i dyshuari është ndaluar për 48 orë.
Policia e Kosovës thekson se rastet e tilla trajtohen me prioritet, për shkak të rrezikut potencial për sigurinë publike.
