Prokuroria Speciale e Republikës së Kosovës dhe Policia e Kosovës kanë nisur një operacion të gjerë kundër krimit të organizuar, trafikimit ndërkombëtar të narkotikëve dhe pastrimit të parave në disa lokacione të vendit.
Sipas një njoftimi të përbashkët të institucioneve, aksioni po zhvillohet nën monitorimin e Prokurorisë Speciale dhe në bazë të urdhëresës së lëshuar nga Gjykata Themelore në Prishtinë.
Operacioni lidhet me dyshimet për përfshirje në trafikim ndërkombëtar të substancave narkotike dhe hetimin e veprave penale që ndërlidhen me pjesëmarrjen ose organizimin e grupit kriminal të organizuar, blerjen, posedimin, shpërndarjen dhe shitjen e paautorizuar të narkotikëve, si dhe pastrimin e parave.
Në këtë aksion po marrin pjesë edhe përfaqësues të Europol, si dhe autoritete ligjzbatuese nga Belgjika, Franca dhe Holanda.
Prokuroria Speciale dhe Policia e Kosovës kanë bërë të ditur se pas përfundimit të operacionit do të publikojnë një komunikatë të përbashkët me detaje shtesë lidhur me rezultatet e aksionit dhe masat e ndërmarra.
Ky operacion konsiderohet një nga aksionet më të rëndësishme të bashkëpunimit ndërkombëtar në luftën kundër krimit të organizuar dhe rrjeteve të trafikimit të narkotikëve që veprojnë në rajon dhe më gjerë.
