Pesë persona janë arrestuar në kuadër të operacionit policor “White Star”, i cili u zhvillua të martën në disa rajone të Kosovës, nën koordinimin e Prokuroria Speciale e Republikës së Kosovës dhe Policia e Kosovës.
Aksioni është realizuar në Prishtinë, Pejë, Prizren, Viti dhe Drenas, bazuar në urdhrat e lëshuara nga Gjykata Themelore dhe nën monitorimin e Prokurorisë Speciale.
Sipas autoriteteve, pesë të dyshuarit janë ndaluar për 48 orë me vendim të prokurorit special, nën dyshimin për përfshirje në veprat penale të pjesëmarrjes ose organizimit të grupit kriminal të organizuar, blerjes, posedimit, shpërndarjes dhe shitjes së paautorizuar të narkotikëve, si dhe pastrimit të parave.
“Pesë personat janë ndaluar me vendim të prokurorit special për 48 orë, nën dyshimin për përfshirje në veprat penale: pjesëmarrja ose organizimi i grupit kriminal të organizuar, blerja, posedimi, shpërndarja dhe shitja e paautorizuar e narkotikëve, si dhe pastrimi i parave”, thuhet në njoftimin e autoriteteve.
Gjatë kontrollit në lokacionet e bastisura, janë sekuestruar prova dhe pasuri të konsiderueshme, përfshirë gjashtë armë zjarri, pesë karikatorë, 239 fishekë, 9.67 gramë kokainë dhe 35.18 gramë fara të dyshuara të marihuanës.
Po ashtu, autoritetet kanë konfiskuar 7,595 euro para të gatshme, 25 telefona mobilë, 10 automjete, një motoçikletë, 10 kompjuterë, 13 USB, një DVR dhe 16 orë dore.
“Gjatë realizimit të urdhër-kontrollit janë gjetur dhe sekuestruar prova relevante dhe pasuri të specifikuara”, thuhet më tej në komunikatë.
Operacioni është mbështetur nga Europol dhe autoritetet ligjzbatuese të Belgjikë, Francë dhe Holandë. Përfaqësues të këtyre institucioneve, së bashku me prokurorin e rastit, kanë monitoruar nga afër zhvillimin e operacionit.
Në fund, Prokuroria Speciale dhe Policia e Kosovës kanë ritheksuar përkushtimin e tyre për luftimin e krimit të organizuar.
“Prokuroria Speciale dhe Policia e Kosovës riafirmojnë angazhimin për luftimin e krimit të organizuar dhe forcimin e sundimit të ligjit”, theksohet në komunikatë.
Autoritetet kanë bërë të ditur se hetimet lidhur me rastin “White Star” janë duke vazhduar.
