Një koncept i ri i avionit komercial turbo-elektrik, i zhvilluar nga Electra, pritet të sjellë një revolucion në industrinë e aviacionit, duke ofruar deri në 17 për qind më shumë efikasitet në distancë krahasuar me modelet konvencionale.
Avioni konceptual përdor një trup të gjerë me dizajn “double-bubble” (flluskë e dyfishtë), i cili i mundëson vetë trupit të gjenerojë më shumë ngritje gjatë fluturimit. Sistemi i shtytjes kombinon dy motorë turbofan nën krahë me ventilatorë elektrikë në pjesën e pasme, të cilët rikuperojnë dhe ri-energjizojnë rrjedhën e ajrit për të rritur efikasitetin aerodinamik.
Kjo teknologji njihet si Boundary Layer Ingestion (gëlltitja e shtresës kufitare) dhe konsiderohet një nga drejtimet më premtuese për avionët e gjeneratës së ardhshme.
Sipas analizës së Electra-s, konfigurimi i ri mund të sjellë deri në 17% përmirësim shtesë të efikasitetit, përtej përfitimeve që priten deri në vitin 2050 nga materialet e avancuara, motorët më modernë dhe përmirësimet aerodinamike.
Dr. Parker Vascik, drejtor i strategjisë së produkteve në Electra, theksoi se elektrifikimi u jep inxhinierëve liri më të madhe në vendosjen e sistemeve të shtytjes.
“Vlera e elektrifikimit në këtë koncept është se na lejon ta vendosim shtytjen aty ku më parë ishte e pamundur, duke optimizuar bashkëpunimin mes strukturës së avionit dhe sistemit të propulsionit”, tha ai.
Një tjetër element i rëndësishëm është fakti se koncepti është projektuar për t’u integruar në infrastrukturën ekzistuese të aeroporteve, pa pasur nevojë për porta të reja apo sisteme speciale karikimi. Avioni mund të përdorë si karburant standard për avionë, ashtu edhe karburant të qëndrueshëm për aviacion (SAF).
Konfigurimi mbështet gjithashtu një kabinë me dy korridore brenda kategorisë së avionëve me trup të ngushtë, duke premtuar rehati më të madhe për pasagjerët dhe proces më të shpejtë të hipjes dhe zbritjes.
Koncepti është zhvilluar në kuadër të programit të NASA për Advanced Aircraft Concepts for Environmental Sustainability (AACES) 2050, që synon krijimin e avionëve më të pastër dhe më efikasë për dekadat e ardhshme.
Përveç avionit konceptual, Electra ka publikuar edhe 11 dokumente teknike, si dhe ka adoptuar mjetin open-source Aviary të NASA-s për projektim multidisiplinar të avionëve.
Në projekt janë përfshirë emra të mëdhenj të industrisë dhe akademisë, përfshirë American Airlines, Honeywell Aerospace, Lockheed Martin dhe MIT.
Sipas CEO-së së Electra-s, Marc Allen, “epoka e tretë e aviacionit” do të ndryshojë rrënjësisht mënyrën se si njerëzit dhe vendet lidhen, duke e çuar aviacionin komercial drejt një të ardhmeje më të qëndrueshme dhe më efikase.
