Bota e shkencës ka humbur një nga figurat e saj më të mëdha. Në moshën 93-vjeçare është ndarë nga jeta fizikani belg dhe fitues i Çmimit Nobel, François Englert, i njohur si një nga “baballarët” e teorisë së bozonit Higgs.
Lajmi është konfirmuar nga Universiteti i Lirë i Brukselit (ULB), ku Englert ka kontribuar për dekada me radhë në kërkimin dhe mësimdhënien shkencore. Sipas njoftimit zyrtar, ai ka ndërruar jetë më 18 qershor 2026 në Ukkel.
Englert konsiderohet një nga figurat kyçe të fizikës moderne, pasi së bashku me Peter Higgs dhe Robert Brout formuloi mekanizmin teorik që shpjegon se si grimcat fitojnë masë – një shtyllë themelore e Modelit Standard të fizikës së grimcave.
Në vitin 2013, ai u nderua me Çmimin Nobel për Fizikë së bashku me Peter Higgs, pas konfirmimit eksperimental të ekzistencës së bozonit Higgs në vitin 2012 në laboratorin CERN në Zvicër. CERN
Kontributi i tij shkencor, i njohur si mekanizmi Brout–Englert–Higgs, konsiderohet një nga zbulimet më të rëndësishme të fizikës së shekullit XX dhe një pikë kthese në kuptimin e strukturës së universit.
Universiteti ULB e ka përshkruar Englert si “një figurë të jashtëzakonshme të fizikës teorike”, duke theksuar se ai la pas një trashëgimi të pashlyeshme në shkencë.
I lindur më 6 nëntor 1932 në Bruksel, Englert iu përkushtua kërkimit shkencor për më shumë se shtatë dekada. Gjatë Luftës së Dytë Botërore, ai dhe familja e tij hebreje u detyruan të fshiheshin për t’i shpëtuar persekutimit nazist.
Për kontributin e tij, ai ishte nderuar edhe me titullin “Baron” nga monarkia belge, duke u konsideruar jo vetëm një shkencëtar i madh, por edhe një figurë simbolike e dijes evropiane.
Me ndarjen e tij nga jeta, komuniteti shkencor humbet një prej mendjeve që ndryshuan mënyrën se si e kuptojmë universin.
