Instagram po teston mënyra të reja për t’u dhënë përdoruesve më shumë kontroll mbi përmbajtjen që shohin në platformë. Sipas një postimi të fundit nga kreu i Instagram-it, Adam Mosseri, rrjeti social synon ta bëjë funksionin “Your Algorithm” (Algoritmi Juaj) një pjesë qendrore të përvojës së përdoruesit.
Ky funksion u lançua vitin e kaluar dhe u jep përdoruesve mundësinë të përcaktojnë se cilat tema dëshirojnë të shohin më shumë ose më pak në feed-in e tyre.
“Ne duam ta evoluojmë ‘Algoritmin Tuaj’ nga një cilësim i thjeshtë në diçka që ndihet thelbësore për përvojën tuaj në Instagram,” tha Mosseri.
Sipas tij, disa nga këto ndryshime janë tashmë në fazë testimi, disa do të prezantohen së shpejti, ndërsa të tjera mund të mos arrijnë kurrë te versioni final i aplikacionit.
Ndër opsionet e reja që po testohen janë:
- Tërheqja poshtë në feed, e cila mund të hapë menunë “Algoritmi Juaj”;
- Rrëshqitja lart nga një Reel, që mund të shfaqë opsione të personalizimit;
- Butona poshtë çdo Reel, për t’i treguar Instagram-it nëse përdoruesi dëshiron të shohë më shumë ose më pak përmbajtje të ngjashme.
Megjithatë, reagimet e përdoruesve tregojnë se kërkesa kryesore mbetet e njëjtë: më pak algoritëm dhe më shumë përmbajtje nga njerëzit që ndjekin.
Një nga komentet më të pëlqyera në postimin e Mosserit e përmblodhi qartë pakënaqësinë e përdoruesve: “Ne thjesht duam që algoritmi të na tregojë postimet e njerëzve që ndjekim.”
Debati mbi algoritmet e rrjeteve sociale vazhdon, ndërsa shumë përdorues kërkojnë kthimin te një eksperiencë më e thjeshtë dhe më kronologjike e shfletimit.
