Presidentja e Kosovës, Vjosa Osmani, ka deklaruar se asnjëherë nuk e ka braktisur elektoratin e Lidhjes Demokratike të Kosovës (LDK), duke theksuar se qëndrimet e saj politike kanë qenë gjithmonë në përputhje me premtimet që kishte dhënë si kandidate për kryeministre.
Në emisionin Debat Plus, Osmani u shpreh se largimi i një pjese të elektoratit të LDK-së në vitin 2020 erdhi si pasojë e gabimeve serioze të lidershipit të atëhershëm të partisë.
Ajo theksoi se nuk është penduar për mbrojtjen e qëndrimeve të saj politike dhe nuk sheh asnjë arsye për të kërkuar falje.
Sipas Osmanit, pikërisht për shkak të këtyre qëndrimeve politike ajo ishte përjashtuar nga lidershipi i atëhershëm i LDK-së, por shtoi se vazhdon t’u qëndrojë besnike atyre edhe sot.
“Vjosa Osmani nuk e ka braktisur kurrë elektoratin e LDK-së. Elektorati i LDK-së nuk është i lidhur me emra. Ata janë larguar në vitin 2020 për shkak të gabimeve fatale të lidershipit të atëhershëm. Nëse dikush mendon se unë do të kërkoj falje pse e kam mbrojtur vullnetin e elektoratit të LDK-së, le ta harrojë – kurrë dhe për jetë. Nuk jam penduar që kam mbrojtur secilin premtim të dhënë para elektoratit si kandidate për kryeministre”, ka deklaruar Osmani.
