Kryetari i Lidhjes Demokratike të Kosovës (LDK), Lumir Abdixhiku, ka konfirmuar se ka pranuar ftesën për takim nga kryetari i Lëvizjes Vetëvendosje (LVV), Albin Kurti, duke theksuar se LDK-ja është e gatshme të kontribuojë në procesin e formimit të institucioneve të reja të Kosovës.
Pas mbledhjes së Kryesisë së LDK-së, Abdixhiku bëri të ditur se do t’i përgjigjet pozitivisht ftesës për një takim në formatin “një plus një”, duke e cilësuar atë si hapin e parë të komunikimit zyrtar mes dy partive pas zgjedhjeve.
“Shprehim gatishmëri që LDK-ja të jetë pjesë aktive drejt formimit të institucioneve të Kosovës. Sot kam marrë një letër ftesë për takim me kryetarin e VV-së në formatin një plus një dhe do t’i përgjigjem pozitivisht kësaj ftese. Do të provoj të takohem edhe me liderët e PDK-së dhe AAK-së për të kuptuar pozicionet e tyre”, deklaroi Abdixhiku.
Ai shtoi se ky është komunikimi i parë zyrtar mes palëve që nga përfundimi i zgjedhjeve dhe se diskutimet do të fokusohen në parime dhe në një qasje gjithëpërfshirëse për zhbllokimin e procesit politik.
Ndërkohë, përmes një deklarate zyrtare, Kryesia Qendrore e LDK-së ka shprehur mbështetje të plotë për Lumir Abdixhikun në udhëheqjen e proceseve politike dhe organizative të partisë, si dhe për angazhimin e tij në bisedimet me partitë parlamentare për formimin e institucioneve të Republikës.
Kryesia vlerësoi se, ndonëse LDK-ja ka shënuar rritje në zgjedhjet e fundit, rezultati nuk i ka përmbushur pritjet politike të partisë. Për këtë arsye, është kërkuar analizë e thellë në të gjitha nivelet organizative për të identifikuar mangësitë dhe për të forcuar më tej strukturat partiake.
Po ashtu, Kryesia ritheksoi se zgjedhjet e brendshme do të mbahen sipas afateve statutare, duke theksuar se vendimmarrja demokratike dhe respektimi i institucioneve të partisë mbeten parime të panegociueshme.
Në përfundim të deklaratës, LDK u bëri thirrje anëtarëve dhe strukturave të saj që të punojnë për forcimin e unitetit dhe rritjen e besimit qytetar, duke theksuar se “LDK është më e madhe se secili prej nesh” dhe se përgjegjësia e përbashkët është ta ruajnë dhe ta zhvillojnë më tej partinë në shërbim të Republikës së Kosovës.
