Ziadin Sela ka fituar pjesërisht betejën gjyqësore kundër shtetit, pasi Gjykata e Apelit në Shkup ka marrë vendim të formës së prerë me të cilin rrit shumën e dëmshpërblimit për dëmin jomaterial të pësuar gjatë sulmit në Kuvendin e Maqedonisë së Veriut më 27 prill 2017.
Sipas aktgjykimit, Republika e Maqedonisë së Veriut obligohet t’i paguajë Selës 7.800.000 denarë si kompensim për cenimin e të drejtave personale dhe dëmet fizike e psikike të shkaktuara gjatë ngjarjeve të dhunshme në Kuvend.
Gjykata e Apelit vlerësoi se gjykata e shkallës së parë nuk kishte marrë parasysh në mënyrë të plotë seriozitetin e lëndimeve dhe pasojat afatgjata që ka pësuar paditësi.
Në arsyetimin e vendimit thuhet se shumat e përcaktuara fillimisht nuk përmbushnin qëllimin e kompensimit, nuk siguronin një dëmshpërblim real dhe nuk pasqyronin rëndësinë e dëmeve të shkaktuara.
Si ndahet dëmshpërblimi
Sipas vendimit të Apelit, kompensimi prej 7.8 milionë denarësh ndahet si më poshtë:
- 1.500.000 denarë për dhimbjet fizike;
- 900.000 denarë për frikën e përjetuar;
- 3.000.000 denarë për dhimbjet shpirtërore si pasojë e zvogëlimit të aktivitetit të përgjithshëm jetësor;
- 600.000 denarë për dhimbjet shpirtërore për shkak të shëmtimit;
- 600.000 denarë për cenimin e dinjitetit personal;
- 600.000 denarë për cenimin e nderit;
- 600.000 denarë për cenimin e reputacionit.
Njëkohësisht, Gjykata e Apelit hodhi poshtë si të pabazuar ankesën e Avokaturës së Shtetit, e cila kishte kërkuar shfuqizimin e vendimit të shkallës së parë dhe rigjykimin e çështjes.
Në padinë civile të paraqitur ndaj shtetit, Ziadin Sela kishte kërkuar 61 milionë denarë si kompensim për dëmet e pësuara gjatë sulmit të dhunshëm në Kuvendin e Maqedonisë së Veriut më 27 prill 2017. Vendimi i fundit i Gjykatës së Apelit është i formës së prerë.
