Janë mësuar tashmë të katër skuadrat gjysmëfinaliste të Kupës së Botës 2026. Argjentina siguroi biletën e fundit për në mesin e katër ekipeve më të mira, pasi mposhti Zvicrën 3-1 pas vazhdimeve, ndërsa më herët Anglia eliminoi Norvegjinë me rezultatin 2-1, në një ndeshje të shoqëruar me polemika.
Kampionët në fuqi të botës do të përballen me Anglinë në gjysmëfinalen e dytë, ndërsa çifti tjetër do të jetë Francë – Spanjë.
Argjentina triumfon pas 120 minutash
Argjentina e nisi ndeshjen në mënyrën më të mirë, duke kaluar në epërsi falë golit me kokë të Alexis Mac Allister, pas një asistimi të Lionel Messit. Me këtë pasim vendimtar, Messi u bë futbollisti me më shumë asistime në historinë e Kupës së Botës, duke arritur në kuotën e 10 asistimeve.
Megjithatë, Zvicra nuk u dorëzua. Në minutën e 67-të, Dan Ndoye barazoi shifrat në 1-1, ndërsa vetëm pesë minuta më vonë helvetët mbetën me një lojtar më pak pas përjashtimit të Breel Embolo me karton të kuq. Vendimi shkaktoi protesta të shumta nga futbollistët zviceranë, përfshirë edhe Granit Xhakën.
Edhe pse me epërsi numerike, Argjentina nuk arriti të shënonte gjatë 90 minutave të rregullta. Fati i ndeshjes u vendos në vazhdime, ku Julián Álvarez realizoi një supergol në minutën e 112-të për 2-1, ndërsa Lautaro Martínez vulosi kualifikimin me golin e tretë në minutën 120+1.
Anglia eliminon Norvegjinë mes polemikave
Në çerekfinalen tjetër, Anglia përmbysi Norvegjinë me rezultatin 2-1 pas kohës shtesë, falë një dopiete të Jude Bellingham.
Norvegjia kaloi e para në avantazh me Andreas Schjelderup, por fundi i pjesës së parë solli episodin më të diskutuar të turneut. Topi u devijua nga kablloja e kamerës ajrore (“spider cam”) gjatë një rivënieje fundore të portierit norvegjez, duke favorizuar aksionin e Anglisë që përfundoi me golin e barazimit të Bellingham.
Pavarësisht protestave të ashpra të futbollistëve norvegjezë, arbitri dhe sistemi VAR nuk e anuluan golin. Më pas, FIFA sqaroi se sensori i topit nuk kishte regjistruar kontakt me kamerën, ndaj VAR nuk kishte marrë sinjal për ndërhyrje.
Goli i fitores për “Tre Luanët” erdhi në minutën e 93-të të vazhdimeve, kur Bellingham shënoi sërish, duke i siguruar Anglisë kalimin në gjysmëfinale.
Çiftet gjysmëfinale
- 14 korrik, ora 21:00 – Francë 🆚 Spanjë
- 15 korrik, ora 21:00 – Angli 🆚 Argjentinë
Rezultatet e çerekfinaleve
- Francë 2-0 Marok
- Spanjë 2-1 Belgjikë
- Norvegji 1-2 Angli (pas vazhdimeve)
- Argjentinë 3-1 Zvicër (pas vazhdimeve)
Me përfundimin e çerekfinaleve, Botërori 2026 hyn në fazën vendimtare, ku katër kombëtaret më të mira do të luftojnë për një vend në finalen e madhe. Anglia dhe Argjentina premtojnë një duel spektakolar, ndërsa Franca dhe Spanja do të rikthejnë një nga rivalitetet më të forta të futbollit evropian.