Prodhuesi britanik i automjeteve Morgan Motor ka marrë miratimin federal për të shitur modelin e ri Supersport në tregun amerikan, duke rikthyer një model me performancë të lartë në SHBA pas më shumë se një dekade.
Homologimi është bërë në bazë të Aktit FAST (Fixing America’s Surface Transportation Act), i cili u lejon prodhuesve të vegjël të shesin deri në 325 automjete në vit që bazohen në modele klasike të prodhuara mbi 25 vjet më parë.
Megjithatë, entuziastët amerikanë do të duhet të bëjnë një kompromis të rëndësishëm. Ndryshe nga versioni evropian, i cili pajiset me motorin gjashtëcilindrash BMW B58 me 340 kuaj fuqi, modeli për SHBA do të përdorë motorin 2.0 litra turbo me katër cilindra BMW B46, që zhvillon 255 kuaj fuqi.
Fuqia transmetohet në rrotat e pasme përmes një transmisioni automatik me tetë marshe ZF, ndërsa Morgan nuk ofron opsion me kambi manuale.
Pavarësisht motorit më modest, Supersport konsiderohet modeli më i avancuar i Morgan deri më sot. Ai ndërtohet mbi platformën e re CXV Generation, e cila është më e lehtë dhe më e ngurtë, duke përmirësuar ndjeshëm manovrimin dhe stabilitetin në rrugë.
Automjeti përfiton gjithashtu nga një sistem i ri drejtimi me reagim më të shpejtë, pezullim i rishikuar dhe përmirësime aerodinamike që reduktojnë rezistencën e ajrit me 5% dhe ngritjen aerodinamike me 20%.
Për ata që kërkojnë performancë edhe më të lartë, Morgan ofron paketën opsionale Dynamic Handling, e cila përfshin amortizatorë të rregullueshëm Nitron, kapak motori prej fibrash karboni dhe rrota ultra të lehta 18 ose 19 inç, të pajisura me goma Michelin Pilot Sport 5.
Në brendësi, Supersport sjell një kombinim të dizajnit klasik me materiale moderne, duke ofruar 11 variante përfundimesh, përfshirë elemente prej druri American Walnut. Modeli është gjithashtu Morgan-i i parë në më shumë se dhjetë vjet që vjen me bagazh të integruar, ndërsa blerësit mund të zgjedhin mes çatisë së fortë prej karboni ose një çatie të butë të palosshme.
Prodhimi i versionit amerikan nis në gusht, ndërsa dërgesat e para janë planifikuar për shtator 2026. Për vitin e parë do të prodhohen më pak se 50 njësi, me një çmim fillestar prej 119,995 dollarësh, duke e vendosur Supersport në të njëjtin segment me modele sportive si Porsche 911 Carrera.
